● हरिशंकर शर्मा
वीरगन्ज / लोकतान्त्रिक समाजवादी पार्टी (लोसपा) का अध्यक्ष महन्थ ठाकुरले मधेशमा अब निर्णायक आन्दोलन हुने बताएका छन् । स्थानीय तहको निर्वाचनलाई लक्षित गर्दै लोकतान्त्रिक समाजवादी पार्टी (लोसपा) ले वीरगन्जमा निकालेको ‘स्वभिमान यात्रा’ ¥याली पश्चात आयोजित स्वाभिमान सभालाई सम्बोधन गर्दै अध्यक्ष ठाकुरले मधेशीमाथि शासकहरुले अहिलेपनि गरि रहेको विभेदलाई अन्त्य गर्न अब मधेशमा निर्णायक आन्दोलन हुने बताए ।
उनले मधेशीहरुको हक अधिकारको लागि शान्तिपूर्ण आन्दोलन गर्दै आएको मधेशीहरुमाथि शासकहरुले बदलाको भावनाले मुद्दा चलाएको आरोप लगाउँदै मधेसीमाथि शासकले अहिले पनि सामाजिक, कानुनी र आर्थिक विभेद् गरिरहेका कारण मधेस आन्दोलन र विद्रोह अहिले पनि जारी रहेको बताए । मधेसको मुद्दा सम्बोधन नभएसम्म मधेस विद्रोह र आन्दोलन निरन्तर चलिरहने भन्दै अध्यक्ष ठाकुरले मधेस २२ जिल्लाको भएपनि शासकले मधेसलाई आठ जिल्लामा सीमित पारेर मधेसमै मधेसीलाई अल्पमत पार्न खोजेको बताए ।
यसैगरि सभालाई सम्बोधन गर्दै वरिष्ठ नेता राजेन्द्र महतोले मधेशीहरुको बाँकी अधिकारको लागि निर्णायक आन्दोलन हुने बताए । उनले मधेसको अधिकार र मागका लागि मधेसी अहिलेपनि संघर्षरत रहेको भन्दै मधेसले आंशिक रुपमा मात्रै आफ्नो अधिकार पाएकोले बाँकी अधिकार प्राप्तिका लागि छिट्टै अर्को मधेस आन्दोलन सुरु हुनेछ र त्यो नै निर्णायक आन्दोलन हुने बताए ।
मधेश आन्दोलनमा वीरगन्जको बलिदान उल्लेख्य रहेको स्मरण गराउँदै नेता महतोले हाम्रो लक्ष्य अधिकार प्राप्तिको लागि आन्दोलन हो र यसमा हामी अडिग रहनुपर्ने बताए । मधेशको मुखौटा लगाएर मधेशीहरुमाथि नै बेइमानी गर्नेहरुलाई मधेशीहरुले पहिचान गरिसकेको भन्दै नेता महतोले २०७२ सालमा मधेसीको छातीमा गोली चलाएर संविधानसभाबाट संविधान जारी गरिएको घटना मधेसी जनताले अहिले पनि नबिर्सिएको र त्यसको बदलमा आगामी चुनावमा लिने बताए ।
हाम्रो मुख्य माग ‘मधेश थरुहट’ प्रदेश थियो, र त्यो पुरा भए वीरगन्ज नै राजधानी हुनेथियो, त्यो हामी सबैलाई थाहा थियो तर त्यो माग पुरा भएन, अनि वीरगन्ज राजधानी कसरी बन्ने भन्दै नेता महतोले बेइमान शासकहरुहरुले वीरगन्जदेखि सप्तरीसम्म ८ जिल्लामा मात्र मधेशलाई सीमित राखिदिएको आरोप लगाए ।
यसैगरि अर्का नेता अनिल झाले मधेसी जनताको भोट लिएर सत्ताको स्वाद चाखिरहेको जसपा अब मधेसी दल नरहेको बताए । उनले मधेसको अधिकार र मधेसको मुद्दा बोकेर अहिलेपनि संघर्ष गरिरहेकाले लोसपा नै अब एकमात्र मधेसी दल रहेको जिकिर गरे । लोसपा पर्साका अध्यक्ष पुरुषोत्तमलाल झाको अध्यक्षतामा आयोजित सभालाई लोसपा नेता लक्ष्मणलाल कर्ण, शशीकपुर मिया, प्रहलाद गिरीलगायतका नेताहरुले पनि सम्बोधन गरेका थिए ।
लोसपाले स्वाभिमान सभाअघि ‘स्वाभिमान यात्रा’ ¥याली समेत निकालेको थियो । वीरगन्ज स्थित चिनीमिल आवास क्षेत्रबाट निकालिएको ¥याली नगर परिक्रमा गर्दै नगरसभागृह (टाउनहल) मा पुगेर स्वाभिमान सभामा परिणत भएको थियो ।
प्रतिक्रिया दिनुहोस् !