पर्सामा तीन लाख ३९ हजार मतदाता

वीरगंज / पर्सा जिल्लामा आगामी स्थानीय तह निर्वाचनका लागि कूल तीन लाख ३९ हजार ८३६ मतदाता कायम भएका छन् । निर्वाचन आयोगका अनुसार पर्सा जिल्लाका १४ वटा स्थानीय तहमा कूल एक लाख ९१ हजार ५३७ जना पुरुष, १ लाख ४८ हजार २८३ जना महिला र १६ जना अन्य गरेर तीन लाख ३९ हजार ८३६ जना मतदाता कायम भएका हुन् ।
गत स्थानीय तहको निर्वाचनमा मतदाताको सङ्ख्या दुई लाख ८० हजार २१२ थियो । यस पटक यो सङ्ख्या ५९ हजार ६२४ ले बढेको हो । आसन्न निवाचन आगामी वैशाख ३० गते गर्ने सरकारको तयारी छ ।
जिल्लाको १४ वटा स्थानीय तहमध्ये सबैभन्दा बढी मतदाता सदरमुकाम वीरगञ्ज महानगरपालिकामा एक लाख २४ हजार ६४७ जना रहेका छन् । गत स्थानीय तहको निर्वाचनभन्दा वीरगञ्जमा १५ हजार ८४६ जना मतदाता बढेका छन् । पर्सामा सबैभन्दा कम मतदाता भएको सङ्ख्या धोविनी गाउँपालिका रहेको छ । धोबिनीमा केवल १२ हजार २३६ जना मतदाता रहेका छन् ।
यसैगरी तीन वटा नगरपालिकामध्ये सबैभन्दा धेरै बहुदरमाई नगरपालिकामा २४ हजार ३१३, पर्सागढी नगरपालिकामा २२ हजार ८०७ र पोखरिया नगरपालिकामा १९ हजार ६६४ मतदाता रहेका छन् । गाउँपालिकामध्ये सबैभन्दा धेरै सखुवापर्सौनी गाउँपालिकामा १९ हजार ७६३, छिपहरमाई गाउँपालिकामा १५ हजार ६६४, जगरनाथपुर गाउँपालिकामा १८ हजार ६१, पकाहमैनपुर गाउँपालिकामा १२ हजार ३१४, विन्दवासिनी गाउँपालिकामा १४ हजार ८०४, कालिकामाई गाउँपालिकामा १२ हजार ९७५, जिराभवानी गाउँपालिकामा १३ हजार ९२९, ठोरी गाउँपालिकामा १४ हजार ७०८ र पटेर्वासुगौली गाउँपालिकामा १३ हजार ९२० जना मतदाता रहेका छन् ।
स्थानीय तह निर्वाचनका लागि पर्सामा १६७ मतदानस्थल संख्या र ४०४ वटा मतदान केन्द्र कायम गरिएको निर्वाचन आयोगको तथ्याङ्कले देखाएको छ । रासस