वीरगन्ज / वीरगन्ज उद्योग वाणिज्य संघका अध्यक्ष डा. सुबोध कुमार गुप्ताको नेतृत्वको टोलीले स्वास्थ्य तथा जनसंख्यामन्त्री विरोध खतिवडासँग भेटघाट तथा छलफल गरेको छ । मन्त्री खतिवडाकै कार्यकक्षमा पुगेका वीरगन्जका उद्योगी व्यवसायीहरुको टोलीले वीरगन्ज विकासको विषयमा विशेष छलफल गरेको थियो ।
छलफलको क्रममा संघका अध्यक्ष डा. गुप्ताले नारायणी अस्पतालको स्तरोन्नति गर्नुपर्ने, पोखरिया अस्पतालमा डाक्टरहरुको दरबन्दी गर्नुपर्ने, वीरगन्ज पथलैया औद्योगिक कोरिडोरमा काम गर्ने श्रमिकहरुलाई लक्षित गरि एउटा औद्योगिक अस्पतालको निर्माण गर्नुपर्ने, म्याद सकिएका औषधि तथा औषधिजन्य पदार्थलाई नष्ट गर्ने आधुनिक मेशिन सरकारी तवरबाट ल्याउनुपर्ने, औषधि सम्बन्धी ऐन कानूनको परिमार्जन गर्नु पर्ने, औषधि उद्योगको विकास, विस्तार, संरक्षण र सम्बद्र्धनको निमित्त औषधि उद्योगहरुको प्रतिनिधित्व हुने गरि एक औषधि विकास परिषद् गठन गर्नुपर्ने लगायतका विषयमा छलफल गरेका थिए ।
स्वास्थ्य तथा जनसंख्या मन्त्री विरोध खतिवडाले वीरगन्ज उद्योग वाणिज्य संघबाट प्रस्तुत गरिएको सुझाव अत्यन्तै सकारात्मक रहेको बताउँदै पोखरिया अस्पतालमा चाँडै डाक्टरको दरबन्दीको व्यवस्था गरिने, औद्योगिक अस्पतालको लागि पहल भइरहेको विश्वास व्यक्त गरे । उनले कानूनी जटिलताका कारण औषधि उद्योगहरुलाई बाधा परिरहेकोले त्यसलाई सहज तुलयाउने बताए । छलफलमा संघका वरिष्ठ उपाध्यक्ष, अनिलकुमार अग्रवाल, उपाध्यक्षद्वय हरि गौतम र माधव राजपाल, महासचिव मनोजकुमार दास, सह–कोषाध्यक्ष, कार्य समिति सदस्य सुनिलकुमार खेतान, सुमन क्याल, नरेश टिबडेवाल, अंकित खेतान लगायतको उपस्थिति रहेको थियो ।
प्रतिक्रिया दिनुहोस् !