चोरीको मोटरसाइकल सहित पक्राउ

वीरगन्ज / प्रहरीले चोरीको मोटरसाइकल सहित एक जनालाई पक्राउ गरेको छ । वीरगञ्ज महानगरपालिकाको वडा नं.१४ बस्ने वर्ष २३ को सुमन पटेललाई प्रहरीले पक्राउ गरेको हो ।
वीरगञ्ज महानगरपालिका वडा नं.१६ नगवा बस्ने बर्ष ३० को नेजामुल हक अन्सारीको नाममा दर्ता रहेका ना.५५ प. ४९८६ नम्बरको रोयल ब्लू रंगको १५० सिसिको पल्सर मोटरसाइकलसहित पटेललाई पक्राउ गरिएको जिल्ला प्रहरी कार्यालय पर्साले जनाएको छ ।
शुक्रबार विहान १० बजे सवारीधनीको घर आँगनमा पार्किङ गरी राखिएको अवस्थामा पटेलले लक तोडी चोरी गरी लगी सिर्सिया ड्राईपोर्ट भित्र पुरानो कन्टेनर भित्र लुकाइ छिपाई राखिएको खुल्न आएको हुँदा उक्त मो.सा.बरामद गरी निजमाथि चोरी कसूरमा अनुसन्धान भैरहेको व्यहोरा जिल्ला प्रहरी कार्यालय पर्साका प्रवक्ता प्रहरी नायब उपरिक्षक ओमप्रकाश खनालले जानकारी दिए ।
पर्सामा दिनहुँ जसो मोटरसाइकल चोरहरु पक्राउ परे पनि प्रहरीको फित्लो गस्तीका कारण मोटरसाइकल चोरीको घटनामा कमी आउन सकेको छैन ।