हरिशंकर शर्मा
वीरगन्ज / नेकपा एमाले अध्यक्ष तथा पूर्व प्रधानमन्त्री केपी शर्मा ओलीले केही समय नेकपा एमाले जनमत जनादेशले नभई परमादेशबाट पछाडि धकेलिएको बताए । बाराको आदर्शकोतवाल गाउँपालिका स्थित रामचरित्र भगत माध्यमिक विद्यालय परिषरमा आयोजित वृहत्त भेला तथा पार्टी प्रवेश कार्यक्रमलाई सम्बोधन गर्दै उनले हामी केही दिन जनमत जनादेशले होइन, परमादेशबाट हामी पछाडि धकेलिएका थियौं, अबको उत्साहपूर्ण नेकपा एमाले प्रवेशको राष्ट्रिय लहरले सत्ताको दौडमा सजिलै जित्नै हैसियत प्रदान गरेको बताए ।
नेकपा एमाले पार्टीले पहिलो पटक प्रधानमन्त्री हुँदा हुलाकी राजमार्ग निर्माणको बजेट छुट्याई निर्माण प्रक्रिया अगाडि बढाएको स्मरण गराउँदै ओलीले सहरी विकास, जनता आवास लगायतका विभिन्न योजनाहरु अगाडि सारेको बताए । नागरिकताको सवालमा वंशजको आधारमा नागरिकता प्राप्त गर्नुपर्छ भनेर अध्यादेश मार्फत कानून बनाएपनि सरकारबाट हटाएपछि अध्यादेशबाट ल्याएको कानूनलाई ओझेलमा पार्ने काम गरियो, तर अबको निर्वाचन पछि हाम्रो पार्टीले खानेपानी, सिचाई, नागरिकता, कृषि आधुनिकीकरण, व्यापारको उन्नति, राष्ट्रिय उत्पादनलाई वृद्धि गर्दै आयात कम गर्ने र निर्यातलाई वृद्धि गर्ने लक्ष्य रहेको बताए ।
नेकपा एमालेले पहाड, मधेश तथा हिमाल सबै जनताको साझा पार्टी हो, यसले साझा बाटो बनाउँछ, रामचरित्र जीले यहाँको विकासमा उल्लेख्नीय भूमिका निर्वाह गर्नुभएको उहाँको कार्यको प्रशंसा गर्दै उहाँको योगदानले यहाँका नागरिकहरुले बालबालिकाहरुले उच्च माध्यमिक तहका अध्ययन गर्न पाएकोले उनको योगदानलाई यहाँको जनताले भुल्न नहुने बताए । नेकपा एमाले यस्ता व्यक्तित्वहरुको साँझा सँस्था हो, उहाँ आज भएको भए नेकपा एमालेकै प्रतिनिधि हुने विश्वास व्यक्त गरे ।
यहाँको नेताहरुले ठूलठूला आन्दोलनमा नेतृत्व गरेका छन्, यहाँका जनताहरुले महत्वपूर्ण भूमिका निर्वाह गरेका छन् । प्रदेश नम्बर २ मा अन्यत्र भन्दा कम बजेट आएको छैन, तर यहाँका नेताहरुले जनताको विकास भन्दा पनि आफ्नो विकास गर्न अग्रसर देखिएको कारण यहाँको विकास कार्य अवरोध भएको भन्दै अन्य पार्टीमा रहेका ति दाजुभाई दिदी बहिनीहरुलाई नेकपा एमालेमा प्रवेश गरेर राष्ट्र निर्माणको अभियानमा सरिक हुन आग्रह गरे ।
यो ठाउँको विकास चेतनाको कमिले र मधेशको नेतृत्वकर्ता नेताहरुको कारण विकास पछाडि परेको भन्दै अब नेकपा एमाले मजबुत बनेको छ, भर्खरै वीरगन्ज महानगरपालिकाका मेयर लगायत अन्य जनप्रतिनिधिहरु पनि नेकपा एमालेमा प्रवेश गरेका छन्, यसबाट नेकपा एमाले झन बलियो पार्टी बनेको छ, हिजोसम्म कमजोर रहेको एमाले पार्टी सबैभन्दा प्रमुख र मजबुत पार्टी बनेको बताए ।
नेकपा एमाले देश विकासको लागि काम गर्ने, जनताको सुविधाका लागि काम गर्ने पार्टी हो, नेकपा एमालेकै सरकारले तराईको विकासमा उल्लेख्नीय योगदान पु¥याएको भन्दै बारा पर्साका नागरिकहरु टोर्नाडोबाट घरविहीन भएपछि केही दिनभित्रै घर निर्माण गरेर जनताहरुलाई हस्तान्तरण गरेको स्मरण गराए । पार्टी प्रवेश कार्यक्रममा ५ हजार भन्दा बढि नेता तथा कार्यकर्ताहरुले विभिन्न पार्टी परित्याग गरि नेकपा एमालेमा प्रवेश गरेका थिए । नव प्रवेशीहरुलाई नेकपा एमाले अध्यक्ष केपी शर्मा ओलीले फुलमाला अविर टिका लगाई पार्टीमा स्वागत गरेका थिए ।
प्रतिक्रिया दिनुहोस् !