वीरगंज (पर्सा), १४ कात्तिक । बैंकिङ क्षेत्रप्रतिको सर्वसाधारणको विश्वासमाथि गम्भीर प्रश्न उठाउने घटना सार्वजनिक भएको छ । नबिल बैंक लिमिटेडको जीतपुर शाखामा तत्कालीन कर्जा विभागमा कार्यरत कर्मचारी निरज प्रसाद गुप्तासहित विभिन्न व्यक्तिहरू संलग्न रहेको आरोपमा पाँच करोड रुपैयाँभन्दा बढीको आर्थिक ठगीसम्बन्धी विवाद बाहिर आएको छ ।
पेट्रोल पम्प तथा अन्य व्यवसाय सञ्चालनका लागि बैंकबाट ऋण मिलाइदिने प्रलोभन देखाएर सर्वसाधारणलाई आर्थिक जालमा फसाइएको पीडितहरूको आरोप छ । यस घटनामा पीडितहरूले जिल्ला प्रहरी कार्यालय बारादेखि नेपाल राष्ट्र बैंकको वीरगंज कार्यालयसम्म उजुरी दिँदै निष्पक्ष छानबिन र दोषीमाथि कडा कानुनी कारबाहीको माग गरेका छन् ।
प्राप्त जाहेरी विवरणअनुसार बाराको कोल्हवी नगरपालिका–८, नयाँबस्ती निवासी राकेश सहनी र उनकी पत्नी रूपा कुमारीले आफ्नो नाममा पेट्रोल पम्प सञ्चालन गर्ने उद्देश्यले नबिल बैंकको जीतपुर शाखामा दुई करोड रुपैयाँ कर्जाका लागि आवेदन दिएका थिए । सोही क्रममा तत्कालीन बैंक कर्मचारी निरज प्रसाद गुप्ताले छिटो र सहज रूपमा ऋण उपलब्ध गराइदिने आश्वासन दिएको पीडित पक्षको भनाइ छ ।
पीडितहरूका अनुसार ऋण प्रक्रियालाई सहज बनाइदिने बहानामा विभिन्न बैंकका चेकमा खाली हस्ताक्षर गराइएको थियो भने आईपीएससम्बन्धी फाराममा समेत हस्ताक्षर गराइएको थियो । यही प्रक्रियाको दुरुपयोग गर्दै विभिन्न बहानामा पीडित, उनीहरूको फर्म तथा बैंक खाताबाट पटक–पटक गरी पाँच करोड रुपैयाँभन्दा बढी रकम हिनामिना भएको जाहेरीमा दाबी गरिएको छ ।
पीडित पक्षले यस घटनामा एक व्यक्तिमात्र नभई विभिन्न व्यक्तिहरू संलग्न रहेको संगठित सञ्जालको आशंका व्यक्त गरेको छ । उनीहरूका अनुसार विभिन्न व्यक्तिको नाममा ऋण निकाल्ने, रकम अन्य बैंक खातामा स्थानान्तरण गर्ने र पछि मिटरब्याज तथा अन्य आर्थिक दबाब सिर्जना गर्ने गतिविधि भएको आरोप छ ।
यस प्रकरणमा मुख्य आरोपित भनिएका निरज प्रसाद गुप्ताले वीरगंजमा करोडौँ मूल्यको घर, दुई बिघाभन्दा बढी जग्गा, ठूलो परिमाणमा सुन तथा महँगा सवारीसाधन जोडेको पीडित पक्षको दाबी छ । उक्त सम्पत्तिको स्रोत, खरिद प्रक्रिया र वैधानिक आयसँगको सम्बन्धबारे सम्बन्धित निकायबाट निष्पक्ष सम्पत्ति छानबिन हुनुपर्ने मागसमेत उठाइएको छ ।
त्यस्तै, खाली हस्ताक्षर गराइएका चेक फिर्ता नगर्ने, चेकको दुरुपयोग गरी बाउन्स गराउने र अदालतमा मुद्दा दायर गर्ने धम्की दिने गरिएको पीडितहरूको गुनासो छ । यसले आफूहरू थप आर्थिक तथा मानसिक तनावमा परेको उनीहरूको भनाइ छ ।
यस प्रकरणमा रोहित वर्णवाल, सुदेव साह कानु, राजीव कुमार गुप्ता, धनञ्जय साह, रोशन गुप्ता, सनी जयसवाल, अमृत कुमार, मनिषा गुप्ता, सुबोध ठाकुर हजाम, अनिश अन्सारी, सीताराम सिंह, ऋतु कुमारी कलवार र उमेर प्रसाद गुप्तालगायतका व्यक्तिहरूको नामसमेत पीडित पक्षले जोडेको छ । यद्यपि, यी व्यक्तिहरूको संलग्नता सम्बन्धित निकायको अनुसन्धान र न्यायिक प्रक्रियाबाट पुष्टि हुन बाँकी छ ।
पीडित राकेश सहनी र रूपा कुमारीले न्यायका लागि नबिल बैंकको वीरगंज शाखा, नेपाल राष्ट्र बैंक तथा प्रहरी प्रशासनसमक्ष पटक–पटक गुहार लगाउँदा पनि अपेक्षित सुनुवाइ नभएको गुनासो गरेका छन् । उनीहरूले आफूहरूलाई ज्यान मार्ने तथा सम्पत्ति हरण गर्ने धम्कीसमेत आएको आरोप लगाउँदै आफ्नो सुरक्षाको माग गरेका छन् ।
अब उठेका गम्भीर प्रश्न
बैंकको कर्जा विभागमा कार्यरत कर्मचारीमाथि नै ग्राहकको विश्वास दुरुपयोग गरी करोडौँ रकम हिनामिना गरेको आरोप लागेपछि बैंकको आन्तरिक नियन्त्रण प्रणाली र निगरानी संयन्त्रमाथि गम्भीर प्रश्न उठेको छ ।
यदि पीडितका आरोप सत्य हुन् भने बैंकका कर्मचारीको मिलेमतोबिना यति ठूलो आर्थिक कारोबार कसरी सम्भव भयो ? खाली चेक र आईपीएस फाराममा गराइएका हस्ताक्षरको प्रयोग कसरी भयो ? सम्बन्धित बैंक खाताबाट भएको कारोबारको निगरानी कसले गर्यो ? आरोपित व्यक्तिहरूको सम्पत्तिको स्रोतबारे छानबिन किन भएको छैन ?
यी प्रश्नको जवाफ सम्बन्धित बैंक व्यवस्थापन, नेपाल राष्ट्र बैंक, प्रहरी प्रशासन तथा अनुसन्धान गर्ने निकायले दिनुपर्ने देखिन्छ । पीडितहरूले घटनाको निष्पक्ष र गहिरो अनुसन्धान गरी दोषी प्रमाणित हुने व्यक्तिलाई प्रचलित कानुनअनुसार कारबाही गर्न, गैरकानुनी रूपमा आर्जित सम्पत्तिको स्रोत छानबिन गर्न, पीडितको रकम फिर्ता गराउन तथा आवश्यक क्षतिपूर्ति उपलब्ध गराउन माग गरेका छन् ।
बैंक जनताको विश्वासमा चल्ने संस्था हो । यदि त्यही विश्वासलाई माध्यम बनाएर आर्थिक शोषण गरिएको हो भने यो केवल केही व्यक्तिमाथिको ठगीको आरोप मात्र होइन, समग्र बैंकिङ प्रणालीको विश्वसनीयतामाथिको गम्भीर चुनौती हो । अब सम्बन्धित निकायले मौनता तोडेर सत्यतथ्य सार्वजनिक गर्ने बेला आएको छ । 
प्रतिक्रिया दिनुहोस् !