बारागढी (बारा), १६ असोज । रसुवा जिल्लामा गत भदौ १० गते आएको विनाशकारी बाढीमा परी बेपत्ता भएका बारागढी गाउँपालिका–१, पिपरा टोलका २० वर्षीय सुबोध शर्माको शव एक महिनाभन्दा बढी समयसम्म नभेटिएपछि अन्ततः कुशको शव बनाएर दाहसंस्कार गरिएको छ । बाढी आएको ३६ दिनसम्म आफ्नो छोराको शव भेटिने आशामा पर्खिएका परिवारजनले अन्ततः शव नै नभेटिएपछि शुक्रबार हिन्दू संस्कारअनुसार कुशको शव बनाएर दाहसंस्कार गरेका हुन् ।
स्थानीय जातीय समुदायका व्यक्तिहरूको पहलमा शर्माको ३६औँ दिनमा दाहसंस्कार गरिएको हो । परिवारका अनुसार लामो समयसम्म शव खोजी गर्दा पनि कुनै टुंगो नलागेपछि बाध्य भएर कुशको शव बनाएर अन्तिम संस्कार गर्नुपरेको हो । मृतकका दाजु नवल शर्माका अनुसार बाढी आएको दिनदेखि नै सुबोध सम्पर्कविहीन भएका थिए । भाइको अवस्था पत्ता लगाउन परिवारले एक महिनासम्म विभिन्न ठाउँमा धाउँदा पनि कुनै जानकारी प्राप्त गर्न सकेन । त्यसपछि नेपाल प्रहरीले सार्वजनिक गरेको शव पहिचानसम्बन्धी वेबसाइटमा राखिएका तस्बिर हेर्दा काठमाडौंस्थित टिचिङ अस्पतालमा रहेको एउटा शव सुबोधकै हुनसक्ने परिवारले पहिचान गरेको थियो ।
तर, उक्त शवलाई यसअघि नै चार जना अन्य परिवारले आफ्ना आफन्तको शव भएको दाबी गरिसकेका कारण पहिचानमा विवाद उत्पन्न भएको थियो । त्यसपछि डीएनए परीक्षण गर्नुपर्ने अवस्था आएको नवल शर्माले बताए । नवलका अनुसार डीएनए परीक्षणका लागि उनका बुवाको रगतसमेत दिइएको तीन साताभन्दा बढी समय बितिसकेको छ, तर अहिलेसम्म परिवारले सुबोधको शव पाउन सकेको छैन ।
‘काठमाडौंस्थित टिचिङ अस्पतालमा गएर राखिएको तस्बिर हेर्दा हामीले आफ्नो भाइको शव पहिचान गरेका थियौँ । तर, त्यही शवलाई चार जना अन्य परिवारले पनि आफ्नो आफन्त भएको दाबी गरेका रहेछन् । त्यसपछि डीएनए परीक्षण गर्न भनियो । बुवाको रगतसमेत परीक्षणका लागि दिएको तीन हप्ताभन्दा बढी भइसक्यो, तर अहिलेसम्म शव पाएका छैनौँ,’ नवलले भने ।
उनका अनुसार शव पाउने आशमा परिवारले एक महिनासम्म विभिन्न निकाय धाउँदै आएको थियो । तर, शवको पहिचान र हस्तान्तरणको प्रक्रिया टुंगिन नसकेपछि अन्ततः ३६औँ दिनमा कुशको शव बनाएर दाहसंस्कार गर्नुपरेको हो । 
डीएनए रिपोर्टको प्रतीक्षामा भरतपुरमा शव
बाढीमा बेपत्ता भएर आएकाहरुको शवलाई उद्दार गरि भरतपुर स्थित सरकारको पहलमा आधुनिक तरिकाबाट गाडेर राखिएको छ । सोही शवहरुमा बेपत्ता सुबोधको शव पनि राखिएको परिवारले जनाएको छ । तर, डीएनए परीक्षण पूरा नभएकै कारण उक्त शव परिवारको जिम्मा लगाइएको छैन । दाजु नवल शर्मा शव बुझ्न भरतपुर पुगेका थिए । तर, भरतपुरस्थित जिल्ला प्रशासन कार्यालयले डीएनए परीक्षणको रिपोर्ट भेरिफाइ भएर आएपछि मात्रै शव परिवारलाई जिम्मा लगाउने जानकारी दिएपछि उनीहरू शव नलिई घर फर्किन बाध्य भएका थिए ।
शव पाउने निश्चितता नभए पनि धार्मिक संस्कार रोकिराख्न नसकिने भएपछि परिवारले शुक्रबार कुशको शव बनाएर सुबोधको अन्तिम संस्कार गरेको हो । शुक्रबार दाहसंस्कार गरिएकाले त्यसै दिनदेखि गणना गरी १३औँ दिनमा काजकिरिया गरिने परिवारले जनाएको छ ।
रोजगारीका लागि रसुवा पुगेका थिए सुबोध
सुबोध शर्मा रोजगारीका सिलसिलामा तीन महिनाअघि मात्रै रसुवा पुगेका थिए । उनी रसुवाको टिमुरेस्थित रसुवागढी हाइड्रोपावर कम्पनी लिमिटेडअन्तर्गत सञ्चालित सेर्पा हाइड्रो कन्स्ट्रक्सन प्रालिमा टायल–मार्बलको काम गर्दै आएका थिए । तर, गत भदौ १० गते रसुवा जिल्लामा आएको विनाशकारी बाढीपछि उनी एकाएक सम्पर्कविहीन भए ।
त्यसयता परिवारले उनको खोजी जारी राख्यो । शव भेटिएला र अन्तिमपटक छोराको मुख हेर्न पाइएला भन्ने आशामा परिवार एक महिनाभन्दा बढी समयसम्म पर्खिरह्यो । तर, शवको पहिचानसम्बन्धी प्रक्रिया, डीएनए परीक्षण र प्रशासनिक प्रक्रियाका कारण परिवारले अझै सुबोधको शव हात पार्न सकेको छैन । अन्ततः शवविहीन अवस्थामै ३६औँ दिनमा कुशको शव बनाएर अन्तिम संस्कार गर्नुपरेको घटनाले बाढीमा आफन्त गुमाएका परिवारले भोगिरहेको पीडा र शव पहिचान तथा हस्तान्तरण प्रक्रियाको जटिलता थप उजागर गरेको छ । 
प्रतिक्रिया दिनुहोस् !