वीरगंज (पर्सा), १५ असोज । करिब एक वर्षदेखि परिवारको सम्पर्कबाट बाहिर रहेकी भारतकी एक महिलाको मानवसेवा आश्रम वीरगंजको पहलमा परिवारसँग पुनर्मिलन भएको छ । परिवारसँग सम्पर्कविहीन रहेकी उनलाई परिवार पहिचान भएपछि बिहीबार भाइको जिम्मा लगाइएको हो । इलाका प्रहरी कार्यालय प्रसौनी, बाराले उद्धार गरी असोज ७ गते राति करिब १० बजे मानवसेवा आश्रम वीरगंजमा ल्याएकी ती महिलाको आश्रमको पहलमा पारिवारिक पहिचान खुलेको हो ।
आश्रमका अनुसार उनी भारतको मोतिहारी जिल्ला, राजेपुर थाना, मोहम्मदपुर सागर गाउँकी हुन् । करिब एक वर्षदेखि परिवारसँग सम्पर्कविहीन रहेकी उनको अवस्थाबारे जानकारी पाएपछि आश्रमले परिवारको खोजी तथा पहिचानका लागि निरन्तर पहल गर्दै आएको थियो । खोजीका क्रममा परिवारसँग सम्पर्क स्थापित भएपछि उनलाई बिहीबार उनका भाइ सोहन रायको जिम्मा लगाइएको मानवसेवा आश्रमका संस्थापक अभियन्ता देवेश गुप्ताले जानकारी दिए ।
गुप्ताका अनुसार लामो समयदेखि आफन्तको सम्पर्कबाट टाढा रहेकी महिलालाई परिवारसँग पुनः जोड्न सक्नु आश्रमको सेवाकार्यको महत्वपूर्ण उपलब्धि हो । परिवारको खोजी तथा पुनर्मिलनका लागि आश्रमले विभिन्न पक्षसँग समन्वय गर्दै आएको उनले बताए । महिलाको उद्धार गरी आश्रमसम्म ल्याउन सहयोग गर्ने इलाका प्रहरी कार्यालय प्रसौनी तथा परिवार पहिचानमा सहयोग गर्ने सामाजिक अभियन्ता विनय कुमारलगायत सबैप्रति आश्रमले आभार व्यक्त गरेको छ ।
मानवसेवा आश्रमले सडक तथा सार्वजनिक स्थानमा अलपत्र अवस्थामा भेटिएका व्यक्तिको उद्धार गरी संरक्षण दिने, आफन्त तथा परिवारको खोजी गर्ने र सम्भव भएसम्म पारिवारिक पुनर्मिलन गराउँदै आएको जनाएको छ । एक वर्षदेखि परिवारबाट टाढा रहेकी महिलालाई आफन्तको जिम्मा लगाएर घर फर्काउन सफल भएपछि आश्रमको उद्धार तथा पुनर्मिलन अभियानले अर्को महत्वपूर्ण उपलब्धि हासिल गरेको छ । 
प्रतिक्रिया दिनुहोस् !