सुखीपुर (सिरहा), १५ असोज । सिरहाको सुखीपुरबाट सशस्त्र प्रहरीले ठूलो परिमाणमा अवैध गाँजा बरामद गरेको छ । विशेष सूचनाका आधारमा गरिएको कारबाहीमा ११ क्विन्टलभन्दा बढी गाँजासहित ओसारपसारमा प्रयोग भएको बोलेरो पिकअप र मोटरसाइकल नियन्त्रणमा लिइएको हो ।
सुखीपुर नगरपालिका–१० स्थित विश्वकर्मा चोक नजिक गागन खोलाको पुल क्षेत्रमा गएराति करिब १ बजे सशस्त्र प्रहरीको संयुक्त गस्ती टोलीले शंकास्पद अवस्थामा दुईवटा सवारीसाधन फेला पारेको थियो । सशस्त्र प्रहरी बल नेपाल नं. ७ गण, सुरक्षा बेस गोलबजार र सुरक्षा बेस सुखीपुरबाट परिचालित संयुक्त टोलीले बा १४ च २९४ नम्बरको बोलेरो पिकअप र त्यसलाई पछाडिबाट स्कर्टिङ गर्दै अघि बढिरहेको स ६ प ४८५९ नम्बरको मोटरसाइकल नियन्त्रणमा लिएको हो ।
गस्ती टोलीले सवारीसाधन रोक्न संकेत गरेपछि दुवै सवारीका चालकले प्रहरीलाई देख्नेबित्तिकै सवारीसाधन त्यहीँ छाडेर फरार भएको सशस्त्र प्रहरीले जनाएको छ । त्यसपछि बोलेरो पिकअपको खानतलासी गर्दा पछाडिको भागमा २६ वटा जुटका बोरा फेला परेका थिए । ती बोराभित्र लुकाएर राखिएको अवस्थामा १ हजार १०२ दशमलव ६५५ किलोग्राम अर्थात् ११ क्विन्टल २ किलोभन्दा बढी गाँजा बरामद भएको प्रहरीले जनाएको छ ।
रातको समयमा ठूलो परिमाणमा गाँजा सवारीसाधनमार्फत ओसारपसार भइरहेको भेटिएपछि प्रहरीले यसलाई सीमापार तस्करीसँग जोडेर अनुसन्धान अघि बढाएको छ । प्रारम्भिक अनुसन्धानमा बरामद गाँजा भारततर्फ लैजाने उद्देश्यले ओसारपसार गरिएको हुनसक्ने प्रहरीको अनुमान छ ।बरामद गाँजा, बोलेरो पिकअप र मोटरसाइकललाई आवश्यक कानुनी कारबाहीका लागि सम्बन्धित जिल्ला प्रहरी कार्यालय तथा नेपाल प्रहरीको जिम्मा लगाउने प्रक्रिया अघि बढाइएको सशस्त्र प्रहरीले जनाएको छ ।
घटनापछि फरार भएका दुवै चालकको खोजी तीव्र पारिएको छ । साथै गाँजा ओसारपसारमा संलग्न सम्भावित व्यक्ति तथा समूहको पहिचानका लागि प्रहरीले थप अनुसन्धान गरिरहेको जनाएको छ । 
प्रतिक्रिया दिनुहोस् !