वीरगंज (पर्सा), १५ असोज । नेकपा एमालेका नेता तथा पर्साको जगरनाथपुर गाउँपालिकाका पूर्वअध्यक्ष जालिम मियाँका कान्छा छोरा जाफिर मियाँ मन्सुरीलाई प्रहरीले पक्राउ गरेको छ । ज्यानसम्बन्धी कसुर तथा सार्वजनिक न्यायविरुद्धको कसुरमा अनुसन्धानका लागि उनलाई बुधबार वीरगंजबाट पक्राउ गरिएको हो ।
जगरनाथपुर गाउँपालिका–५ का स्थायी बासिन्दा तथा हाल वीरगंज महानगरपालिका–१३ मुर्लीमा बस्दै आएका करिब ४० वर्षीय मन्सुरीलाई बुधबार दिउँसो पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए । मन्सुरी भैंसी तथा पाडाको व्यापार गर्दै आएका छन् ।
प्रहरीका अनुसार मन्सुरीमाथि आफ्नै सालीको मृत्यु प्रकरणमा संलग्न रहेको आरोप छ । जगरनाथपुर गाउँपालिका–४ निवासी उनकी अविवाहित सालीको मृत्यु भएको घटनामा यसअघि उनका दाजु नासिर अहमदलाई पनि प्रहरीले पक्राउ गरिसकेको छ । नासिर हाल प्रहरी हिरासतमा छन् ।
पाँच वर्षअघि गुपचुप शव गाड्ने प्रयास
प्रहरीका अनुसार २०७८ साल असोज २१ गते ती युवतीको शव वीरगंज महानगरपालिका–१३ मुर्लीस्थित कब्रस्तानमा प्रहरीलाई जानकारी नदिई गाड्ने प्रयास गरिएको थियो । शव गाड्न लागिएको सूचना पाएपछि प्रहरीले घटनास्थलबाट नासिर, जाफिरलगायत व्यक्तिलाई नियन्त्रणमा लिएको थियो ।
अनुसन्धानका क्रममा युवतीमाथि जबर्जस्ती करणी भएको र त्यसपछि अत्यधिक रक्तश्रावका कारण सिकिस्त अवस्थामा गाउँकै एक क्लिनिकमा उपचारका क्रममा उनको मृत्यु भएको आरोपसमेत प्रहरीले उल्लेख गरेको छ ।
मृत्युपछि घटना लुकाउने उद्देश्यले शवलाई वीरगंज ल्याएर कब्रस्तानमा गुपचुप रूपमा गाड्न खोजिएको आरोप छ । सोही घटनाको अनुसन्धानका क्रममा प्रहरीले संलग्नताको आरोप लागेका व्यक्तिहरूमाथि अनुसन्धान अघि बढाएको हो ।
पाँच वर्षपछि फेरि अनुसन्धान तीव्र
घटना भएको करिब पाँच वर्षपछि प्रहरीले नासिर र जाफिरलाई पक्राउ गरेर अनुसन्धानलाई पुनः अगाडि बढाएको जनाएको छ । यसअघि राजनीतिक पहुँचका कारण घटनाको अनुसन्धान प्रभावकारी रूपमा अघि नबढाइएको आरोपसमेत लाग्दै आएको थियो ।
प्रहरीले भने अहिले घटनालाई पुनः अनुसन्धानको दायरामा ल्याइएको जनाएको छ । घटनामा संलग्न रहेको आरोप लागेका अन्य व्यक्तिहरू अझै फरार रहेको र उनीहरूको खोजी भइरहेको प्रहरी प्रवक्ता मल्लले बताए ।
पक्राउ परेका जाफिरमाथि ज्यानसम्बन्धी कसुर तथा सार्वजनिक न्यायविरुद्धको कसुरमा अनुसन्धान भइरहेको प्रहरीले जनाएको छ । घटनाको वास्तविकता विस्तृत अनुसन्धानपछि थप स्पष्ट हुने प्रहरीको भनाइ छ । 
प्रतिक्रिया दिनुहोस् !