वीरगंज (पर्सा), १४ असोज । वीरगंज महानगरपालिकाले चालु आर्थिक वर्ष २०८३/८४ को बजेट संशोधन गर्दै २१ करोड रुपैयाँ घटाएको छ । नेपाली कांग्रेसबाट निर्वाचित जनप्रतिनिधिहरूलाई विशेष नगरसभामा सहभागी नहुन पार्टीले ह्विप जारी गरेकै बीच बुधबार सम्पन्न २१औँ विशेष नगरसभाले संशोधित बजेट बहुमतबाट पारित गरेको हो । यसअघि असार १० गते सम्पन्न २०औँ नगरसभाले चालु आर्थिक वर्षका लागि ४ अर्ब ४२ करोड ३४ लाख ६९ हजार रुपैयाँको बजेट पारित गरेको थियो । त्यतिबेला महानगरका प्रमुख राजेशमान सिंह निलम्बनमा रहेकाले उपप्रमुख इम्तियाज आलम कार्यवाहक प्रमुखको भूमिकामा थिए ।
विशेष अदालतबाट सफाइ पाएपछि असोज ३ गते पुनः पदमा फर्किएका मेयर सिंहले उक्त बजेट संशोधनका लागि विशेष नगरसभा बोलाएका थिए । सोहीअनुसार बुधबारको सभाबाट २१ करोड घटाएर कुल बजेट ४ अर्ब २१ करोड ३४ लाख ६९ हजार रुपैयाँ कायम गरिएको हो । संशोधित बजेटमा चालुतर्फ २ अर्ब ३३ करोड १६ लाख ८५ हजार रुपैयाँ अर्थात् ५६ प्रतिशत, पुँजीगततर्फ १ अर्ब ८१ करोड १७ लाख ८४ हजार रुपैयाँ अर्थात् ४३ प्रतिशत र वित्तीय व्यवस्थातर्फ ७ करोड रुपैयाँ अर्थात् १ प्रतिशत विनियोजन गरिएको छ ।
महानगरका अनुसार आन्तरिक राजस्व परिचालनमा आएको संकुचन, वित्तीय समानीकरण अनुदान तथा राजस्व बाँडफाँटबाट अनुमानअनुसार स्रोत प्राप्त हुन नसक्नु र अनिवार्य चालु खर्चमा वृद्धि हुनु बजेट संशोधनका प्रमुख कारण हुन् । संशोधित बजेटमा आन्तरिक राजस्वबाट १ अर्ब २७ करोड, संघीय अन्तरसरकारी वित्तीय हस्तान्तरणबाट १ अर्ब ९८ करोड २९ लाख तथा संघीय राजस्व बाँडफाँटबाट २४ करोड ६८ लाख ८३ हजार रुपैयाँ प्राप्त हुने अनुमान गरिएको छ ।
यता बजेट संशोधनको प्रक्रियालाई लिएर महानगरमा राजनीतिक मतभेद पनि देखिएको छ । नेपाली कांग्रेस पर्सा जिल्ला कार्यसमितिले मंगलबार विज्ञप्ति जारी गर्दै पार्टीबाट निर्वाचित उपमेयर, वडाध्यक्ष, कार्यपालिका सदस्य र वडा सदस्यलाई विशेष नगरसभामा सहभागी नहुन ह्विप जारी गरेको थियो । त्यसअनुसार उपमेयर इम्तियाज आलमसमेत विशेष नगरसभामा उपस्थित भएनन् । तर कांग्रेसको बहिष्कारका बाबजुद विशेष नगरसभा सञ्चालनका लागि आवश्यक संख्या पुगेको थियो ।
मेयर सिंहका स्वकीय सचिव सत्यराज घिमिरेका अनुसार सभामा बहुमतभन्दा बढी नगरसभा सदस्य सहभागी भएका थिए र संशोधित बजेट बहुमतबाट पारित गरिएको हो । कांग्रेसको निर्देशन हुँदाहुँदै पनि कांग्रेसबाट निर्वाचित केही नगरसभा सदस्य भने सभामा सहभागी भएका थिए । संशोधित बजेटमार्फत महानगरले पूर्वाधार, सहरी सौन्दर्यीकरण, शिक्षा, स्वास्थ्य, यातायात र वातावरणलाई प्राथमिकतामा राखेको छ । घण्टाघरनजिक निर्माणाधीन बीपी उद्यानमा वाक–वे, बाल उद्यान, ज्येष्ठ नागरिक विश्राम केन्द्र र हरियाली विस्तार गरी चालु आर्थिक वर्षभित्र सञ्चालनमा ल्याउने मेयर सिंहले बताएका छन् ।
त्यस्तै ‘उज्यालो वीरगंज’ अभियानलाई निरन्तरता दिँदै मुख्य सडक, चोक तथा भित्री बस्तीमा स्मार्ट एलईडी र हाइमास्ट बत्ती विस्तार गर्ने, सडक करिडोर तथा डिभाइडरमा हरियाली प्रवद्र्धन गर्ने, खुला स्थानमा पार्क निर्माण गर्ने तथा अव्यवस्थित तार र होर्डिङ बोर्ड व्यवस्थापन गर्ने योजना महानगरले अघि सारेको छ । शैक्षिक क्षेत्रलाई व्यवस्थित बनाउन विद्यालयको दरबन्दी, विद्यार्थी संख्या र भौतिक संरचनाबीच तादात्म्य कायम गर्ने तथा भोजपुरी भाषा, संस्कृति, साहित्य र कलाको संरक्षण र प्रवद्र्धनका कार्यक्रम सञ्चालन गर्ने पनि मेयर सिंहले बताए ।
नगरवासीको स्वास्थ्यका लागि आधारभूत स्वास्थ्य केन्द्र, योग तथा ध्यान केन्द्र, आरोग्य केन्द्र र खुला व्यायामशाला व्यवस्थित गर्ने योजना पनि संशोधित बजेटमा समेटिएको छ । निजी क्षेत्रसँगको सहकार्यमा वीरगन्जमा नगर बस सेवा सञ्चालन गर्ने योजना अघि बढाउने सिंहले बताएका छन् । यसरी बजेटको आकार घटाएर नयाँ प्राथमिकता र स्रोतको यथार्थतामा आधारित बजेट ल्याइएको महानगरको दाबी छ भने बजेट संशोधनको प्रक्रियालाई लिएर देखिएको राजनीतिक मतभेदले विशेष नगरसभालाई थप चर्चामा ल्याएको छ । 
प्रतिक्रिया दिनुहोस् !