वीरगंज (पर्सा), १४ असोज । नेपाली कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले मुलुक गम्भीर राष्ट्रिय संकट र असाधारण राजनीतिक परिस्थितिबाट गुज्रिरहेको दाबी गरेका छन् । वीरगंजमा आयोजित पार्टी एकता समायोजन, शपथ ग्रहण तथा प्रशिक्षण कार्यक्रममा बोल्दै उनले वैदेशिक शक्ति केन्द्रको प्रभाव र सरकारका कदमविरुद्ध वामपन्थी तथा देशभक्त शक्तिहरू एक ठाउँमा उभिनुपर्ने बताएका हुन् ।
प्रचण्डले संविधान, गणतन्त्र तथा विगतका राजनीतिक उपलब्धिको रक्षाका लागि सडक, सदन र आगामी निर्वाचनलाई समेत संघर्षको माध्यम बनाउनुपर्ने बताएका छन् । उनका अनुसार प्राप्त अधिकार खोस्ने प्रयास भइरहेको भन्दै परिवर्तनकारी शक्तिहरूबीच एकता आवश्यक भएको छ । ‘देशमा प्रतिक्रान्तिको हावा चलाउने र प्राप्त अधिकारहरू खोस्ने षड्यन्त्र भइरहेको छ,’ प्रचण्डले भने, ‘संविधान र गणतन्त्र जोगाउन हामीले हिजो पनि मध्यरातिसम्म संघर्ष गरेका थियौँ, आज पनि खतराको घण्टी बजिरहेको छ ।’
वर्तमान सरकार विदेशी शक्तिको प्रभावमा सञ्चालन भइरहेको आरोपसमेत उनले लगाए । नेपाली जनताको हातबाट राजनीतिक नेतृत्व उम्किन सक्ने जोखिम रहेको दाबी गर्दै प्रचण्डले संविधान, गणतन्त्र र प्राप्त उपलब्धि जोगाउन परिवर्तनकारी शक्तिबीच सहकार्य आवश्यक रहेको बताए । मधेश र वीरगंजले नेपालको राजनीतिक परिवर्तनका विभिन्न चरणमा महत्वपूर्ण भूमिका खेलेको उल्लेख गर्दै प्रचण्डले राणाविरोधी संघर्षदेखि किसान विद्रोह र विभिन्न आन्दोलनमा मधेशको सहभागितालाई स्मरण गरे । मधेशका जनता राजनीतिक परिवर्तनका संघर्षका उत्तराधिकारी रहेको दाबी गर्दै सामाजिक अन्याय र निरंकुशताविरुद्ध पुनः एकजुट हुनुपर्ने बताए ।
नयाँ राजनीतिक दल तथा जनप्रतिनिधिको राजनीतिबारे टिप्पणी गर्दै प्रचण्डले सामाजिक सञ्जालमा आधारित प्रचारले जनतामाझ राजनीतिक भ्रम सिर्जना गरिरहेको बताए । सामाजिक सञ्जालका एल्गोरिदमले जनमत प्रभावित पारिरहेको उल्लेख गर्दै उनले आफ्नो नेतृत्वका सरकार तथा पार्टीले गरेका जनपक्षीय काम प्रभावकारी रूपमा जनतासम्म पुर्याउन नसक्दा भ्रमको अवस्था बनेको स्वीकारे ।
सरकारले सुकुम्बासीमाथि बल प्रयोग तथा डोजर चलाएको र तराई–मधेशका किसान तथा साना व्यवसायीमाथि करको भार बढाएको आरोप पनि प्रचण्डले लगाए । विधि र प्रक्रिया मिचेर गिरफ्तारी गर्ने तथा लोकतान्त्रिक अधिकार कटौती गर्ने काम भइरहेको उनको दाबी थियो । सुकुम्बासीलाई वैकल्पिक व्यवस्था नगरी विस्थापित गर्न नहुने, कसैलाई बिना कारण गिरफ्तार गर्न नहुने र जनतामाथि अनावश्यक करको भार थोपर्न नहुने उनले बताए ।
कार्यक्रममा नेकपाका सहसंयोजक एवं पूर्वप्रधानमन्त्री माधवकुमार नेपालले सामाजिक न्याय र समानतामा आधारित समाजवाद निर्माणका लागि कम्युनिष्ट शक्तिबीच एकता आवश्यक रहेको बताए । उनले आगामी स्थानीय तहको निर्वाचनलाई लक्षित गर्दै पार्टीलाई बलियो बनाउन नेता–कार्यकर्तालाई सक्रिय हुन आग्रह गरे । समसामयिक रिपोर्टहरूमा पनि नेपालले संविधानको रक्षा र प्राप्त अधिकारको संरक्षणका लागि परिवर्तनकारी शक्तिबीच कार्यगत एकताको आवश्यकता औँल्याएको उल्लेख छ ।
नेता मातृका यादवले व्यक्तिगत स्वार्थभन्दा माथि उठेर देश र जनताको हितमा काम गर्नुपर्नेमा जोड दिए । नेकपा पर्साका संयोजक जयप्रकाश थारुको अध्यक्षतामा सम्पन्न कार्यक्रममा नेकपा मधेश प्रदेश इन्चार्ज महेन्द्रप्रसाद यादव, नेता रामकुमार भट्टराईलगायतले मन्तव्य राखेका थिए । कार्यक्रमको सञ्चालन पर्साका सहइन्चार्ज मनोज चौधरीले गरेका थिए ।
प्रतिक्रिया दिनुहोस् !