सिम्रौनगढ (बारा), १३ असोज । बाराको सिम्रौनगढबाट सशस्त्र प्रहरीले दुई थान कटुवा पेस्तोल र पाँच राउन्ड गोलीसहित एक जनालाई पक्राउ गरेको छ । पक्राउ पर्नेमा सिम्रौनगढ नगरपालिका–२ अमृतगञ्जका अन्दाजी ५० वर्षीय जयप्रकाश प्रसाद कुशवाहा रहेका छन् ।
सशस्त्र प्रहरी बल नेपाल इन्टेलिजेन्स ब्युरोबाट प्राप्त विशेष सूचनाका आधारमा खटिएको टोलीले कुशवाहालाई सिम्रौनगढ नगरपालिका–६ सलेमपुरबाट नियन्त्रणमा लिएको हो । सशस्त्र प्रहरी बोर्डर आउट पोस्ट गोलागञ्जबाट परिचालित टोलीले सोमबार सलेमपुरमा कुशवाहालाई पक्राउ गरेको जनाएको छ । उनको साथबाट दुई थान कटुवा पेस्तोल, पाँच राउन्ड गोली र एउटा मोबाइल फोन बरामद गरिएको सशस्त्र प्रहरीले जनाएको छ ।
सशस्त्र प्रहरी बल नेपाल नम्बर १२ गण हेडक्वार्टर बाराका सूचना अधिकारी एवं सशस्त्र प्रहरी नायब उपरीक्षक (डीएसपी) विक्रममणि अधिकारीले विशेष सूचनाका आधारमा गरिएको कारबाहीका क्रममा कुशवाहा पक्राउ परेको जानकारी दिए । बरामद हतियार, गोली तथा मोबाइलसहित पक्राउ परेका कुशवाहालाई थप अनुसन्धान र आवश्यक कानुनी कारबाहीका लागि इलाका प्रहरी कार्यालय सिम्रौनगढमा बुझाइएको सशस्त्र प्रहरीले जनाएको छ ।
हतियारसहित व्यक्ति पक्राउ परेपछि प्रहरीले घटनासँग सम्बन्धित थप विवरण तथा हतियारको स्रोतबारे अनुसन्धान अघि बढाएको जनाएको छ । 
प्रतिक्रिया दिनुहोस् !