सिरहा, १२ असोज । डकैती, ज्यान मार्ने उद्योग, लागूऔषध, हातहतियार तथा खरखजाना र संगठित अपराधसम्बन्धी मुद्दामा फरार रहेका एक अभियुक्तलाई सिरहा प्रहरीले पक्राउ गरेको छ । पक्राउ पर्नेमा धनुषाको विदेह नगरपालिका–५ झिझा टोलका करिब ४० वर्षीय ‘बद्री’ भन्ने अजय पासवान रहेका छन् । जिल्ला प्रहरी कार्यालय सिरहाका अनुसार उनलाई विशेष सूचनाका आधारमा बुधबार साँझ सिरहा नगरपालिका–६ स्थित कमला खोलाको आसपासबाट पक्राउ गरिएको हो ।
प्रहरीका अनुसार पासवानसहित १२ जनाको समूहले २०८२ मंसिर २ गते राति करिब १ बजे कल्याणपुर नगरपालिका–१२ बेल्हा टोलका भोला महतोका छोरा मुकेशकुमार सिंहको घरमा हतियार देखाएर डकैती गरेको थियो । उक्त समूहले घरबाट नगद तथा जिन्सी सामान गरी ९ लाख ७३ हजार ६ सय ५० रुपैयाँ बराबरको धनमाल लुटेको प्रहरीको दाबी छ । डकैतीपछि भाग्ने क्रममा समूहले बिरेन्द्र महतो र अनिलकुमार महतोलाई गोली प्रहार गरी घाइते बनाएको प्रहरीले जनाएको छ ।
घटनापछि समूहमा संलग्न अधिकांश व्यक्ति फरार भएका थिए । उनीहरूको खोजीका क्रममा प्रहरीले अनुसन्धानलाई निरन्तरता दिँदै आएको थियो । सोही क्रममा प्राप्त विशेष सूचनाका आधारमा जिल्ला प्रहरी कार्यालय सिरहाबाट खटिएको टोलीले पासवानलाई कमला खोलाको आसपास हिँडिरहेको अवस्थामा नियन्त्रणमा लिएको जिल्ला प्रहरी कार्यालय सिरहाका सूचना अधिकारी प्रहरी नायब उपरीक्षक रमेशबहादुर पालले जानकारी दिए ।
पक्राउ परेका पासवानलाई जिल्ला प्रहरी कार्यालय सिरहामा राखेर थप अनुसन्धान भइरहेको प्रहरीले जनाएको छ । प्रहरीका अनुसार पासवानविरुद्ध डाँका, ज्यान मार्ने उद्योग, लागूऔषध, हातहतियार तथा खरखजाना र संगठित अपराधसम्बन्धी मुद्दामा अनुसन्धान पूरा भई सिरहा जिल्ला अदालतमा मुद्दा चलिरहेको छ । घटनामा संलग्न अन्य फरार व्यक्तिको खोजी जारी रहेको र घटनाका सम्बन्धमा थप अनुसन्धान भइरहेको जिल्ला प्रहरी कार्यालय सिरहाले जनाएको छ । 
प्रतिक्रिया दिनुहोस् !