नवलपरासी, १० असोज । नारायणी नदीको जलस्तर लगातार बढेपछि पश्चिम नवलपरासीको सुस्ता गाउँपालिका–५ का बस्तीहरू बाढीको उच्च जोखिममा परेका छन् । नदीको बाढी बस्तीमा पस्दा १६५ घर प्रभावित भएका छन् भने सशस्त्र प्रहरीले डुबानमा परेका २९ जनाको सकुशल उद्धार गरेको छ । केही दिनदेखि भइरहेको अविरल वर्षाका कारण नारायणी नदीमा पानीको बहाव बढेपछि शुक्रबारदेखि सुस्ताको थारु टोलमा बाढी पस्न थालेको थियो ।
त्यसपछि सैनिक टोल र बड्का टोलमा समेत पानी पस्दा स्थानीयलाई सुरक्षित स्थानमा सारिएको हो । थारु टोलका ७८ परिवारलाई शुक्रबार दिउँसो नै सुस्तामा निर्माण गरिएको होल्डिङ सेन्टरमा स्थानान्तरण गरिएको थियो । बाढी थप बस्तीमा प्रवेश गरेपछि सैनिक टोल र बड्का टोलका थप ८५ परिवारलाई समेत सुरक्षित स्थानमा सारिएको सशस्त्र प्रहरी बेस क्याम्प सुस्ताले जनाएको छ ।
यसैबीच डुबानमा परेका स्थानीयको उद्धारका लागि शनिबार बिहान सशस्त्र प्रहरी बल, नेपाल बीओपी सुस्ताबाट उद्धार टोली परिचालन गरिएको थियो । सशस्त्र प्रहरी निरीक्षक मनोज कार्कीको कमान्डमा खटिएको २१ सदस्यीय टोलीले बाढीमा फसेका २९ जनालाई सकुशल उद्धार गरेको हो। उद्धार टोलीले एक गाई र १३ वटा बाख्रालाई समेत सुरक्षित स्थानमा सारेको छ । उद्धार गरिएका मानिस तथा चौपायालाई सुस्ता गाउँपालिका–५ स्थित होल्डिङ सेन्टरमा राखिएको सशस्त्र प्रहरीले जनाएको छ ।
बढ्दो जलस्तरले थप जोखिम
नारायणी नदीमा पानीको सतह अझै बढ्ने क्रममा रहेकाले सुस्ताका अन्य बस्तीसमेत जोखिममा रहेको स्थानीयले बताएका छन् । शनिबार बिहान ७ बजे गण्डक ब्यारेजमा गरिएको मापनअनुसार नदीमा पानीको बहाव प्रतिसेकेन्ड २ लाख ६७ हजार क्युसेक पुगेको थियो ।
स्थानीयका अनुसार नारायणी नदीले धार परिवर्तन गरेर सुस्तातर्फ सोझिएपछि करिब एक लाख क्युसेक पानीको बहाव पुग्नेबित्तिकै बस्तीमा बाढी पस्ने गरेको छ । अहिले नदीको बहाव त्यसभन्दा निकै माथि पुगेकाले जोखिम थप बढेको वडा सदस्य आदम खानले बताए । बाढीका कारण कच्ची घरमा पानी पस्दा स्थानीयको जनजीवन प्रभावित भएको छ । बस्तीका साथै उखु खेतीमा समेत क्षति पुगेको स्थानीयको भनाइ छ ।
१३२ मिटर तटबन्ध अधुरै
सुस्तामा बाढीको जोखिम बढ्नुको अर्को कारण निर्माणाधीन तटबन्धको अधुरो कामलाई स्थानीयले औँल्याएका छन् । निर्माण हुन बाँकी रहेको करिब १३२ मिटर क्षेत्रमा नदीले कटान गर्दै बस्ती नजिकै पुगेको स्थानीय बाबु खानले बताए ।
स्थानीयका अनुसार उक्त तटबन्ध निर्माण भारतीय पक्षबाट रोकिएपछि सो क्षेत्र अझै अधुरो अवस्थामा छ । नदीको बहाव बढेसँगै त्यही क्षेत्रबाट कटानको जोखिम बढेको उनीहरूको भनाइ छ । बाढीको जोखिमलाई मध्यनजर गर्दै जिल्ला प्रशासन कार्यालयले सुरक्षा संयन्त्रलाई तयारी अवस्थामा राखेको छ । प्रमुख जिल्ला अधिकारी दीपकराज नेपालले जोखिममा परेका परिवारलाई तत्काल उद्धार गर्नुपर्ने अवस्था आए सुरक्षाकर्मीको टोली परिचालनका लागि तयारी अवस्थामा रहेको बताए ।
यसैबीच बाढी प्रभावित क्षेत्रमा सशस्त्र प्रहरीको उद्धार तथा निगरानी कार्य जारी रहेको छ । नदीको जलस्तर अझै बढिरहेको अवस्थामा सुस्ताका बाँकी बस्तीमा समेत बाढी पस्न सक्ने जोखिम रहेकाले स्थानीयलाई सुरक्षित स्थानमा सार्ने तयारी भइरहेको सुरक्षा निकायले जनाएको छ ।
प्रतिक्रिया दिनुहोस् !