वीरगंज (पर्सा), १० असोज । रसुवाको भोटेकोशी नदीमा आएको विनाशकारी बाढीमा परी लामो समयदेखि बेपत्ता रहेका वीरगंज महानगरपालिका–२७ उदयपुरघुर्मीस्थित कुहडी गाउँका दुई ट्रक चालकका परिवारलाई नगर प्रमुख राजेशमान सिंहले भेट गरी उनीहरूको अवस्थाबारे जानकारी लिएका छन् । भदौ १० गते बिहान भोटेकोशी नदीमा एक्कासि आएको बाढीमा परी कुहडी गाउँका २९ वर्षीय सागर कर्ण र २८ वर्षीय मुन्ना अंसारी बेपत्ता भएका थिए । दुवै जना ट्रक चालक हुन् । रसुवा भन्सारबाट सामान लिएर फर्किने तयारीमा रहेका उनीहरू बाढी आएपछि सम्पर्कविहीन भएको परिवारजनले बताएका छन् ।
शनिबार पीडित परिवारसँग भेट गर्दै नगर प्रमुख सिंहले बाढीमा बेपत्ता भएका व्यक्तिको अवस्था, खोजीका क्रममा भएका प्रयास तथा परिवारले भोगिरहेको पीडाबारे जानकारी लिएका हुन् । उनले विपद्का कारण आफन्त गुमाउने तथा बेपत्ता हुने परिवारको दुःखमा महानगरपालिका साथमा रहेको बताउँदै आवश्यक सहयोग र समन्वयका लागि पहल गर्ने प्रतिबद्धता व्यक्त गरे । अचानक आएको बाढीले दुई परिवारलाई लामो समयदेखि अनिश्चितताको पीडामा राखेको छ । आफन्त जीवितै भेटिने आशा र अवस्थाबारे कुनै निश्चित जानकारी नपाउँदाको पीडा परिवारले खेपिरहेका छन् । यस्तो अवस्थामा स्थानीय सरकारको प्रत्यक्ष उपस्थिति र समन्वयले पीडित परिवारलाई राहत पुग्ने अपेक्षा गरिएको छ ।
नगर प्रमुख सिंहले यसअघि पनि भोटेकोशी बाढीमा बेपत्ता भएका वीरगंजका परिवारसँग भेट गर्दै उनीहरूको अवस्था बुझ्दै आएका छन् । उनले वीरगंज महानगरपालिका–२२ जगरनाथपुरको एउटै टोलबाट बेपत्ता भएका ६ जनाका परिवारसँग भेट गरी खोजी तथा राहतका विषयमा जानकारी लिएका थिए । त्यसैगरी वडा नम्बर ८ का बेपत्ता परिवारसँग पनि भेट गरी उनीहरूको अवस्थाबारे जानकारी लिइसकेका छन् ।
भोटेकोशी बाढीपछि वीरगंज महानगरपालिकाका विभिन्न वडाका नागरिक बेपत्ता भएपछि महानगरपालिकाले प्रभावित परिवारसँग प्रत्यक्ष सम्पर्कमा रहेर आवश्यक सहयोग तथा सम्बन्धित निकायसँग समन्वयको काम अघि बढाइरहेको जनाएको छ । बेपत्ता व्यक्तिको अवस्था अझै स्पष्ट हुन नसकेको अवस्थामा परिवारको पीडा सम्बोधन गर्दै खोजी, पहिचान र आवश्यक राहतका लागि प्रभावकारी समन्वय आवश्यक देखिएको छ ।
प्रतिक्रिया दिनुहोस् !