मोटरसाइकलको ठक्करबाट वृद्ध पैदलयात्रीको मृत्यु, चालक फरार

चन्द्रपुर (रौतहट), ९ असोज । रौतहटको चन्द्रनिगाहपुर–गौर सडकखण्डमा मोटरसाइकलको ठक्करबाट एक वृद्ध पैदलयात्रीको मृत्यु भएको छ । दुर्घटनामा संलग्न मोटरसाइकल चालक भने फरार भएका छन् ।

चन्द्रपुर नगरपालिका–८ वसन्तपुरमा बिहीबार राति सडकमा हिँडिरहेका स्थानीय ६५ वर्षीय सीताराम चौधरीलाई नम्बर नखुलेको मोटरसाइकलले ठक्कर दिएको थियो । दुर्घटनामा गम्भीर घाइते भएका चौधरीको उपचारका क्रममा मृत्यु भएको प्रहरीले जनाएको छ । दुर्घटनापछि मोटरसाइकल चालक घटनास्थलबाट फरार भएका छन् ।

हालसम्म मोटरसाइकलको नम्बर तथा चालकको पहिचान खुल्न सकेको छैन । इलाका प्रहरी कार्यालय चन्द्रनिगाहपुरका प्रमुख डीएसपी सत्यनारायण थापाका अनुसार दुर्घटनामा संलग्न मोटरसाइकल र चालकको खोजी भइरहेको छ । दुर्घटनास्थल आसपास जडान गरिएका सीसीटीभी क्यामेरा प्रभावकारी रूपमा सञ्चालनमा नरहेको कारण दोषि पत्ता लाग्न नसकेको स्थानीयको भनाई छ ।