वीरगंज (पर्सा), ८ असोज । प्रतिकूल मौसमका कारण वीरगंज महानगरपालिकाभित्र सञ्चालित सम्पूर्ण सामुदायिक तथा संस्थागत विद्यालयमा असोज ९ गते (शुक्रबार) एक दिनका लागि पठनपाठन बन्द हुने भएको छ । महानगरपालिकाको शैक्षिक प्रशासन महाशाखाले बिहीबार सूचना जारी गर्दै महानगर क्षेत्रका सबै विद्यालयमा शुक्रबार पठनपाठन स्थगित रहने जानकारी दिएको हो ।
शिक्षा तथा खेलकुद मन्त्रालयबाट प्राप्त पत्रलाई आधार बनाउँदै महानगरपालिकाले नेपालका विभिन्न स्थानमा भारी वर्षा, हावाहुरी तथा चट्याङको सम्भावना रहेकाले त्यसबाट हुन सक्ने प्रतिकूल प्रभावलाई ध्यानमा राखेर विद्यालय बन्द गर्ने निर्णय गरेको जनाएको छ । मौसम प्रतिकूल बन्न सक्ने सम्भावनाका कारण विद्यार्थी, शिक्षक तथा विद्यालयसँग सम्बन्धित अन्य व्यक्तिको सुरक्षालाई प्राथमिकतामा राख्दै असोज ९ गते एक दिनका लागि नियमित कक्षा सञ्चालन नगर्ने निर्णय गरिएको महानगरपालिकाले स्पष्ट पारेको छ ।
यसैबीच, समुदायमा विपद्को अवस्था सिर्जना भए विद्यालय भवनलाई सुरक्षित आश्रयस्थलका रूपमा प्रयोग गर्न सकिने गरी आवश्यक तयारी अवस्थामा राख्न महानगरपालिकाले सबै विद्यालय प्रशासनलाई निर्देशन दिएको छ । महानगरपालिकाले सम्भावित विपद्को समयमा विद्यालयका भौतिक संरचनालाई सुरक्षित तथा व्यवस्थित रूपमा प्रयोग गर्न सकिने अवस्था सुनिश्चित गर्नसमेत विद्यालय प्रशासनलाई आग्रह गरेको छ ।
प्रतिक्रिया दिनुहोस् !