कलैया (बारा), ८ असोज । १२ वर्षीया बालिकालाई अपहरण गरी करिब १० दिनसम्म बन्धक बनाएर पटक–पटक जबरजस्ती करणी गरेको कसुरमा १८ वर्ष कैद सजाय सुनाइएका फरार प्रतिवादी पक्राउ परेका छन् । पक्राउ पर्नेमा रौतहटको कटहरिया नगरपालिका–७ बगही घर भई हाल बाराको कलैया उपमहानगरपालिका–४ मा डेरा गरी बस्दै आएका २३ वर्षीय अफरोज अन्सारी रहेका छन् ।
उनलाई प्रहरीले बुधबार कलैया उपमहानगरपालिका–६ स्थित बजार क्षेत्रबाट पक्राउ गरेको जिल्ला प्रहरी कार्यालय बाराले जनाएको छ । प्रहरीका अनुसार अन्सारीले २०७८ माघ १० गते १२ वर्षीया बालिकालाई ललाइफकाई तथा डरत्रास देखाई अपहरण गरेका थिए । अपहरणपछि बालिकालाई कलैया उपमहानगरपालिका–४ स्थित मैदामिल पछाडिको झाडीमा लगेर जबरजस्ती करणी गरेको अनुसन्धानबाट खुलेको थियो ।
त्यसपछि अन्सारीले बालिकालाई बसमा राखेर काठमाडौंको वनस्थली पुर्याई एउटा कोठामा बन्धक बनाएर राखेका थिए । प्रहरी विवरणअनुसार वनस्थलीमा समेत उनले बालिकामाथि पटक–पटक जबरजस्ती करणी गरेका थिए । बालिकालाई करिब १० दिनसम्म नियन्त्रणमा राखिएको प्रहरीले जनाएको छ । घटनाबारे पीडित परिवारले प्रहरीमा जाहेरी दिएपछि अनुसन्धान अघि बढाइएको थियो । अनुसन्धानका क्रममा प्रहरीले २०७८ माघ २० गते बालिकाको उद्धार गरेको थियो । त्यसपछि अन्सारीविरुद्ध अपहरण, शरीर बन्धक तथा जबरजस्ती करणीसम्बन्धी कसुरमा मुद्दा दर्ता गरिएको थियो ।
मुद्दाको सुनुवाइपछि उच्च अदालत जनकपुरको अस्थायी इजलास वीरगंजले २०८२ पुस २४ गते अन्सारीलाई १८ वर्ष कैद सजाय सुनाएको थियो । अदालतले उनलाई ६ लाख रुपैयाँ जरिवाना तिराउने तथा पीडित राहत कोषमा २४ हजार रुपैयाँ जम्मा गर्नेसमेत आदेश दिएको थियो । तर अदालतको फैसला कार्यान्वयन हुनुअघि नै अन्सारी फरार रहेका थिए । प्रहरीले उनको खोजी जारी राखेको थियो ।
अन्ततः बुधबार कलैयाबाट पक्राउ परेका अन्सारीलाई आवश्यक कारबाहीका लागि बारा जिल्ला अदालत कलैयामा पेस गरिएको प्रहरीले जनाएको छ । अदालतको आदेशअनुसार उनलाई वीरगंज कारागार पठाइएको जिल्ला प्रहरी कार्यालय बाराले जनाएको छ ।
प्रतिक्रिया दिनुहोस् !