वीरगंज (पर्सा), ७ असोज । पर्सा प्रहरीले १५४ ग्राम ब्राउन सुगरजस्तो देखिने पदार्थसहित दुई जनालाई पक्राउ गरेको छ । लागूऔषध खरिद–बिक्री भइरहेको विशेष सूचनाका आधारमा प्रहरीले उनीहरूलाई वीरगंज महानगरपालिका–१५ स्थित चालीस फिटे सडकखण्डबाट नियन्त्रणमा लिएको हो ।
जिल्ला प्रहरी कार्यालय पर्सा र लागूऔषध नियन्त्रण ब्युरो शाखा कार्यालय वीरगंजबाट खटिएको संयुक्त टोलीले मंगलबार साँझ भारततर्फको नम्बर प्लेट भएको बि.आर. ०५ बि.एल. १६८० नम्बरको कालो–रातो रंगको टि.भि.एस. अपाचे मोटरसाइकलमा सवार दुई जनालाई शंकास्पद अवस्थामा रोकेर जाँच गरेको थियो । जाँचका क्रममा उनीहरूको पाइन्टको खल्तीबाट १५४ ग्राम ब्राउन सुगरजस्तो देखिने पदार्थ फेला परेको प्रहरीले जनाएको छ ।
पक्राउ पर्नेमा छिपहरमाई गाउँपालिका–२ का ४६ वर्षीय रेयाज आलम र जगरनाथपुर गाउँपालिका–६ माधोपुरका ३७ वर्षीय सन्तोष प्रसाद पटेल रहेका छन् । प्रहरीले पटेलको घरमा समेत खानतलासी गरेको थियो । त्यसक्रममा कालो प्लास्टिकमा लुकाएर राखिएको ११ ग्राम ५९ मिलिग्राम अफिमजस्तो देखिने पदार्थ तथा लागूऔषध प्याकिङ गर्न प्रयोग हुने प्लास्टिकसमेत बरामद भएको प्रहरीले जनाएको छ ।
बरामद पदार्थको परीक्षण तथा घटनासम्बन्धी थप अनुसन्धान भइरहेको प्रहरीले जनाएको छ । लागूऔषधसहित पक्राउ परेका दुवै जनालाई बरामद मोटरसाइकलसहित नियन्त्रणमा राखेर अनुसन्धान अघि बढाइएको जिल्ला प्रहरी कार्यालय पर्साका प्रवक्ता प्रहरी नायव उपरीक्षक चक्रबहादुर मल्लले जानकारी दिए । प्रहरीले उनीहरूबाट बरामद भएका पदार्थ लागूऔषध भए/नभएको तथा घटनामा उनीहरूको संलग्नताको विषयमा थप अनुसन्धान गरिरहेको जनाएको छ ।
प्रतिक्रिया दिनुहोस् !