वीरगंज (पर्सा), ६ असोज । नेपाली कम्युनिष्ट पार्टी (नेकपा) पर्साले जिल्ला एकता समायोजन, शपथ ग्रहण तथा प्रशिक्षण कार्यक्रमको मिति परिवर्तन गरेको छ । यसअघि असोज ११ गतेका लागि तय गरिएको कार्यक्रम अब असोज १४ गते आयोजना हुने भएको हो ।
मौसम पूर्वानुमानअनुसार असोज ८ देखि १२ गतेसम्म प्रतिकूल मौसमको सम्भावना रहेकाले कार्यक्रमको मिति सारिएको नेकपा पर्साका संयोजक जयप्रकाश थारूले जानकारी दिए । परिवर्तित तालिकाअनुसार कार्यक्रम असोज १४ गते बिहान १० बजे वीरगञ्ज नगर सभा गृहमा हुनेछ ।
कार्यक्रममा नेकपा संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ प्रमुख अतिथिका रूपमा सहभागी हुने जनाइएको छ । सहसंयोजक एवं पूर्वप्रधानमन्त्री माधवकुमार नेपाललाई विशिष्ट अतिथिका रूपमा सहभागी गराउने तयारी छ ।
जिल्ला एकता समायोजनसँगै शपथ ग्रहण र प्रशिक्षणसमेत हुने भएकाले नेकपा पर्साले कार्यक्रमलाई संगठनात्मक रूपमा महत्वपूर्ण कार्यक्रमका रूपमा अघि बढाएको जनाएको छ । नेकपा पर्साका सहइन्चार्ज मनोज चौधरीका अनुसार कार्यक्रममा पार्टीका सम्पूर्ण केन्द्रीय समिति सदस्य, मधेश प्रदेश समिति सदस्य तथा जिल्ला समिति सदस्यलाई अनिवार्य रूपमा समयमै उपस्थित हुन आग्रह गरिएको छ ।
उनले कार्यक्रमलाई भव्य तथा सभ्य रूपमा सफल बनाउन पार्टीका सम्बन्धित सबै तहका नेताकार्यकर्तालाई आवश्यक समन्वय र तयारीसहित सहभागी हुन आग्रह गरिएको बताए ।
प्रतिक्रिया दिनुहोस् !