वीरगंज (पर्सा), ५ असोज । पर्साको जिराभवानी गाउँपालिकाका दुई विद्यालयमा राहत करार शिक्षक नियुक्तिका क्रममा लाखौँ रुपैयाँको आर्थिक चलखेल भएको आरोप सार्वजनिक भएको छ । शिक्षक नियुक्तिका लागि परीक्षार्थीसँग रकम असुली गरिएको दाबी गर्दै जिराभवानी गाउँपालिकाका युवा समाजले निष्पक्ष छानबिन गरी दोषी देखिएमा संलग्नमाथि कानुनी कारबाही गर्न माग गरेको छ ।
जिराभवानी गाउँपालिका–स्थित श्री नेपाल राष्ट्रिय माध्यमिक विद्यालय, सेढवा बिर्तामा निम्न माध्यमिक तहको राहत करार शिक्षक नियुक्तिका लागि शनिबार परीक्षा सञ्चालन गरिएको थियो । तर, परीक्षा सम्पन्न हुनुअघि नै शिक्षक नियुक्तिका नाममा रकम लेनदेन भएको दाबी सार्वजनिक भएपछि उक्त नियुक्ति प्रक्रियामाथि प्रश्न उठेको हो ।
परीक्षार्थीहरूले सम्बन्धित निकायमा दिएको निवेदनमा विद्यालयका प्रधानाध्यापक खेमराज प्रसाद महतोले परीक्षा हुनुभन्दा करिब तीन महिनाअघि नै एक परीक्षार्थीसँग नियुक्तिका लागि ६ लाख रुपैयाँ लिएको आरोप लगाइएको छ । त्यस्तै, विद्यालय व्यवस्थापन समितिका अध्यक्ष अशोक महतोबाट समेत १ लाख रुपैयाँ रकम लिइएको जानकारी प्राप्त भएको जिराभवानी गाउँपालिकाका युवा समाजले जनाएको छ ।
शिक्षक नियुक्तिजस्तो संवेदनशील प्रक्रियामा आर्थिक कारोबार भएको आरोप लागेपछि युवा समाजले छानबिनको माग अघि सारेको हो । समाजले नियुक्ति प्रक्रियामा आर्थिक चलखेल भए त्यसले योग्य उम्मेदवारको अधिकार कुण्ठित गर्नुका साथै निष्पक्ष छनोटको आधारमाथि नै गम्भीर प्रश्न खडा गर्ने जनाएको छ ।
युवा समाजले सम्बन्धित निकायमा बुझाएको निवेदनमा शिक्षक नियुक्तिका क्रममा रकम लिइएको वा नलिइएको विषयमा गहिरो अनुसन्धान गर्न माग गरिएको छ । सम्भावित आर्थिक कारोबारको विवरण परीक्षण गर्न तथा आरोप पुष्टि भएमा संलग्न व्यक्तिमाथि प्रचलित कानुनअनुसार कारबाही गर्नसमेत आग्रह गरिएको छ ।
त्यसैगरी, विद्यालयमा सञ्चालन गरिएको शिक्षक छनोट परीक्षाको प्रक्रिया, परीक्षा सञ्चालनसम्बन्धी निर्णय, उत्तरपुस्तिका, मूल्याङ्कन प्रणाली तथा नियुक्तिसँग सम्बन्धित आर्थिक कारोबारको समेत निष्पक्ष छानबिन गर्न युवा समाजले माग गरेको छ । नियुक्ति प्रक्रियामा पारदर्शिता कायम गर्दै योग्य उम्मेदवारको निष्पक्ष छनोट सुनिश्चित गर्न स्थानीय तह र सम्बन्धित शिक्षा निकायको ध्यानाकर्षण गराइएको समाजले जनाएको छ ।
जितपुर नौकाटोलाको शिक्षक नियुक्तिमा पनि लाखौँको लेनदेनको आरोप
जिराभवानी गाउँपालिका–३ स्थित बितो महतो जनता माध्यमिक विद्यालय, जितपुर नौकाटोलामा समेत राहत करार शिक्षक नियुक्तिका क्रममा आर्थिक लेनदेन भएको आरोप लागेको छ । स्रोतका अनुसार माध्यमिक तहको राहत करार नेपाली विषयको शिक्षक नियुक्तिका क्रममा ७ लाख रुपैयाँसम्म रकम लेनदेन भएको दाबी गरिएको छ ।
स्रोतले उक्त रकम विद्यालयका प्रधानाध्यापक रामाशंकर प्रसाद, विद्यालय व्यवस्थापन समितिका अध्यक्ष सिताराम राय थारु, गाउँपालिकाको शिक्षा शाखाका कर्मचारी तथा शिक्षा विकास तथा समन्वय इकाइ पर्साका प्रतिनिधिबीच बाँडफाँट भएको दाबी गरेको छ । दुई विद्यालयमा शिक्षक नियुक्तिका क्रममा आर्थिक अनियमितताको आरोप उठेपनि जिराभवानी गाउँपालिकाको शिक्षा शाखाले भने यस विषयमा औपचारिक उजुरी प्राप्त नभएको जनाएको छ ।
गाउँपालिकाका शिक्षा शाखा प्रमुख शिवराज फ्यूयालले शिक्षक नियुक्तिमा आर्थिक लेनदेन भएको सम्बन्धमा कार्यालयमा कुनै निवेदन वा उजुरी नआएको बताए । उनले अनुमानका आधारमा कसैमाथि आरोप लगाउन नहुने धारणा राख्दै आर्थिक लेनदेन भएको तथ्य र प्रमाण फेला परे सम्बन्धित व्यक्तिमाथि कानुनअनुसार कारबाही हुने स्पष्ट पारे । फ्यूयालले आफूलाई यससम्बन्धी कुनै गुनासो प्राप्त नभएको समेत बताए ।
शिक्षक नियुक्तिमा लाखौँ रुपैयाँको चलखेल भएको आरोप सार्वजनिक भएपछि अब सम्बन्धित निकायले छानबिन अघि बढाउँछ वा आरोपहरू आरोपमै सीमित हुन्छन् भन्ने विषय चासोको केन्द्रमा परेको छ । आरोपहरूको सत्यतथ्य छानबिनपछि मात्रै यथार्थ बाहिर आउनेछ ।
प्रतिक्रिया दिनुहोस् !