वीरगंज (पर्सा), ४ असोज । रसुवाको भोटेकोशी नदीमा आएको विनाशकारी बाढीमा परी बेपत्ता भएका वीरगंज महानगरपालिका–२२ जगरनाथपुरका ६ जनाका परिवारलाई महानगरपालिकाले राहत तथा आवश्यक सहयोग उपलब्ध गराउने भएको छ । बाढी आएको लामो समय बितिसक्दा पनि एउटै टोलका ६ जना सम्पर्कविहीन रहेपछि पीडित परिवारको पीडामा साथ दिन महानगरपालिका अघि सरेको हो ।
आइतबार वीरगंज महानगरपालिकाका मेयर राजेशमान सिंह र पूर्वमन्त्री प्रदीप यादव जगरनाथपुर पुगेर बेपत्ता व्यक्तिका परिवारसँग भेट गरेका छन् । उनीहरूले परिवारका सदस्यसँग बेपत्ताको अवस्था, अहिलेसम्म भएका खोजी प्रयास तथा परिवारले भोगिरहेका समस्या र कठिनाइबारे जानकारी लिएका थिए ।
भेटका क्रममा मेयर सिंहले बेपत्ता परिवारको दुःखमा महानगरपालिका साथमा रहेको बताउँदै तत्काल उपलब्ध गराउन सकिने राहत तथा आवश्यक सहयोग प्रदान गर्ने प्रतिबद्धता जनाए । बेपत्ताको खोजी, शवको पहिचान र परिवारलाई आवश्यक सहजीकरणका लागि सम्बन्धित निकायसँग समन्वय गर्ने आश्वासनसमेत उनले दिएका छन् ।
‘आफ्नो परिवारको सदस्यको अवस्थाबारे अनिश्चित भएर बस्नुपर्दाको पीडा निकै गम्भीर हुन्छ । यो दुःखको घडीमा वीरगंज महानगरपालिका बेपत्ता परिवारसँगै छ। महानगरपालिकाको तर्फबाट तत्काल गर्न सकिने सहयोग उपलब्ध गराउनेछौँ र आवश्यक समन्वय पनि गर्नेछौँ,’ मेयर सिंहले भने ।
एउटै टोलका ६ युवा बेपत्ता, परिवारमा छटपटी कायमै
भदौ १० गते भोटेकोशी नदीमा आएको बाढीपछि जगरनाथपुरको एउटै टोलका ६ जना सम्पर्कविहीन भएका थिए । बेपत्ता हुनेमा २१ वर्षीय साहबुद्दिन मन्सुरी, २० वर्षीय राहुल मियाँ, १४ वर्षीय सरताज मियाँ, १७ वर्षीय समिम आलम, २० वर्षीय सर्फराज मियाँ र १६ वर्षीय रिजवान अन्सारी रहेका छन् ।
साहबुद्दिन, राहुल, सरताज, समिम र सर्फराज टिमुरेस्थित मोटरसाइकल ग्यारेजमा काम गर्न पुगेका थिए । रिजवान भने बेत्रावती–१० स्थित अन्सारी मोटरसाइकल वर्कसपमा कार्यरत थिए । बाढी आएको दिनदेखि उनीहरू परिवारको सम्पर्कमा आएका छैनन् । लामो समय बितिसक्दा पनि बेपत्ताको अवस्था पत्ता नलागेपछि परिवारमा अन्योल र पीडा झनै गहिरिएको छ ।
छोराको खोजीमा टिमुरेसम्म पुगे, शव राखिएको स्थानसमेत छानबिन गरे
समिम आलमका बुवा तैयब मियाँ मन्सुरीले छोराको खोजीका लागि परिवारका सदस्य टिमुरेसम्म पुगेपनि कुनै जानकारी प्राप्त गर्न नसकेको बताए । ‘छोरा भेटिन्छ कि भनेर टिमुरेसम्म पुग्यौँ । शव राखिएको ठाउँमा समेत पुगेर खोज्यौँ, तर छोराको कुनै अत्तोपत्तो भएन,’ तैयबले भने ।
तैयबका दाजु उजिर मियाँ मन्सुरीका छोरा सर्फराजसमेत बाढीमा बेपत्ता छन् । एउटै परिवारका दुई दाजुभाइका एक–एक छोरा बेपत्ता भएपछि परिवारमा थप पीडा थपिएको छ । उनीहरूकै आफन्त अहमद मियाँका छोरा २० वर्षीय राहुल मियाँ पनि बेपत्ता भएका छन् । बेपत्ताको पहिचानका लागि फेला परेका शवसँग डीएनए परीक्षणमार्फत मिलान गर्न परिवारका सदस्यहरूले रगतको नमुनासमेत बुझाएका छन् । तर अहिलेसम्म आफ्ना आफन्तबारे कुनै निश्चित जानकारी प्राप्त हुन नसकेको उजिरले बताए ।
मोटरसाइकल मर्मत सिक्न गएका किशोरदेखि रोजगारीका लागि पुगेका युवासम्म बेपत्ता
१४ वर्षीय सरताज मियाँ बाढी आउनुभन्दा करिब दुई महिनाअघि मात्रै मोटरसाइकल मर्मत गर्ने सीप सिक्न टिमुरे पुगेका थिए । साहबुद्दिन र सर्फराज पनि टिमुरे गएको करिब दुई साता मात्रै भएको परिवारजनले बताएका छन् । रोजगारी तथा सीप सिक्ने उद्देश्यले घरबाट टाढा पुगेका उनीहरू विपत्तिपछि सम्पर्कविहीन बनेका हुन् ।
साहबुद्दिनका बुवा अली मियाँ अझै पनि छोराको मोबाइल नम्बरमा फोन गरिरहेका छन् । छोरासँग सम्पर्क होला र उनी घर फर्किएलान् भन्ने आशा आफूले नछाडेको उनले बताए । ‘बाढी आएको दिनदेखि नै नम्बरमा फोन गरिरहेको छु । कतै फोन लागिहाल्छ कि, छोरा फर्केर आउँछ कि भन्ने आशा अझै छ,’ अलीले भने ।
पीडित परिवारलाई राज्यका सबै तहबाट सहयोग आवश्यक : यादव
भेटका क्रममा पूर्वमन्त्री प्रदीप यादवले विपत्तिका कारण आफन्त बेपत्ता भएका परिवारलाई राज्यका सबै तहबाट सहयोग र समन्वय आवश्यक रहेको बताए । उनले पीडित परिवारको अवस्था बुझेर राहत तथा आवश्यक सहयोगका लागि सम्बन्धित निकायसँग समन्वय गर्ने प्रतिबद्धता जनाए । बेपत्ता परिवारले लामो समयसम्म अनिश्चितताको पीडा भोग्नुपर्ने अवस्था दुःखद रहेको भन्दै खोजी, पहिचान र राहतको कामलाई प्रभावकारी बनाउनुपर्नेमा उनले जोड दिए ।
वीरगंजका बेपत्ता परिवारको समस्या समाधानका लागि आफ्नो तर्फबाट समेत पहल गर्ने यादवले बताए । भोटेकोशी बाढीमा बेपत्ता भएको लामो समय बितिसक्दा पनि जगरनाथपुरका ६ परिवारले आफ्ना आफन्तको अवस्थाबारे कुनै निश्चित जानकारी पाउन सकेका छैनन् । महानगरपालिकाले सहयोगको प्रतिबद्धता जनाए पनि बेपत्ताको खोजी र पहिचानको काम प्रभावकारी रूपमा अघि बढाउनु परिवारका लागि अझै प्रमुख चुनौती बनेको छ ।
प्रतिक्रिया दिनुहोस् !