देवानगञ्ज (सुनसरी), ३ असोज । सुनसरीको देवानगञ्ज गाउँपालिका–१ मा गोली चलेको घटनामा एक जना घाइते भएका छन्। गोली लागेर घाइते भएका व्यक्तिको तिघ्रामा चोट लागेको प्रहरीले जनाएको छ । सुनसरी जिल्ला प्रहरी कार्यालयका डीएसपी चन्द्र खड्काका अनुसार घटनाबारे प्रारम्भिक जानकारी प्राप्त भए पनि घाइतेको अवस्था र पहिचान भने खुल्न बाँकी छ ।
स्थानीयवासीले देवानगञ्ज–१ मा गोली चलेको जानकारी गराएपछि प्रहरीले तत्काल घटनास्थलतर्फ टोली परिचालन गरेको थियो । प्रमुख जिल्ला अधिकारी ईश्वरीप्रसाद अर्यालका अनुसार प्रहरी टोली घटनास्थलमा पुगेर घटनाको वास्तविकता तथा थप विवरण संकलन गरिरहेको छ ।
गोली चल्नुको कारण अहिलेसम्म स्पष्ट हुन सकेको छैन । घटनामा प्रयोग भएको हतियार, गोली चलाउने व्यक्ति तथा घटनाको पृष्ठभूमिबारे प्रहरीले अनुसन्धान अघि बढाएको छ । प्रहरीले घटनास्थल आसपासका व्यक्तिसँग सोधपुछ गर्नुका साथै गोली चलेको परिस्थितिबारे आवश्यक प्रमाण तथा सूचना संकलन गरिरहेको जनाएको छ । घटनाको विस्तृत विवरण अनुसन्धानपछि मात्र खुल्ने प्रहरीले जनाएको छ ।
प्रतिक्रिया दिनुहोस् !