वीरगंज (पर्सा), ३ असोज । वीरगंज महानगरपालिकाले वीपी उद्यानभित्र रहेको पुरानो रेल्वे क्षेत्रको सरसफाई गर्दै रोकिएको रेल्वे पार्क निर्माणको कामलाई पुनः अघि बढाउने तयारी गरेको छ । महानगर प्रमुख राजेशमान सिंहको निर्देशनमा शनिबार, वीपी उद्यानभित्रको रेल्वे क्षेत्रमा सरसफाइ गरिएको हो ।
करिब तीन महिनादेखि झाडी र फोहोरले अस्तव्यस्त बनेको उक्त क्षेत्रमा झाडी हटाउने तथा सरसफाइ गर्ने काम गरिएको महानगरले जनाएको छ । वीपी उद्यानलाई वीरगंजको प्रमुख हरित तथा सार्वजनिक मनोरञ्जन क्षेत्रका रूपमा विकास गर्ने महानगरको योजनाअन्तर्गत रेल्वे क्षेत्रलाई ऐतिहासिक महत्व र वीरगंजको पहिचानसँग जोडेर रेल्वे पार्कका रूपमा विकास गर्ने योजना अघि सारिएको हो । उक्त योजनाअन्तर्गत यसअघि काम सुरु गरिएको थियो । तर महानगर प्रमुख सिंह निलम्बनमा परेपछि काम रोकिएको थियो ।
यसैबीच वीरगंजको मुख्य सडक विस्तारका क्रममा विद्युतका पोलमा रहेका तारहरू टुटेर सडक तथा फुटपाथमा लत्रिँदा बढेको आवागमनको समस्या समाधान गर्न तार व्यवस्थापनको काम सुरु गरिएको छ । सडक विस्तारका क्रममा विभिन्न स्थानमा विद्युतका तार अव्यवस्थित भएपछि पैदल यात्रु तथा स्थानीयवासीलाई जोखिम मोलेर हिँड्नुपर्ने अवस्था सिर्जना भएको थियो ।
वीरगंज महानगरपालिकाका मेयर राजेशमान सिंहको निर्देशनअनुसार शनिबार बिहानदेखि घण्टाघर चोकबाट सडक तथा फुटपाथमा लत्रिएका विद्युतका तार हटाउने काम सुरु गरिएको इन्जिनियर उपाध्यायले जानकारी दिएका छन् ।
प्रतिक्रिया दिनुहोस् !