वीरगंज (पर्सा), ३ असोज । जनता समाजवादी पार्टी (जसपा) नेपालका अध्यक्ष उपेन्द्र यादवले मधेसी जनतालाई ‘मधेस राज्य’ निर्माणका लागि पुनः आन्दोलन गर्न तयार रहन आह्वान गरेका छन् । वीरगंजमा शनिबार आयोजित ९ दलीय अग्रगामी मोर्चाको मधेश प्रदेशस्तरीय कार्यकर्ता भेला तथा अभिमुखीकरण कार्यक्रममा सम्बोधन गर्दै यादवले अहिलेको मधेश प्रदेशले आफूहरूले खोजेको स्वशासन र प्रशासनिक अधिकार सुनिश्चित गर्न नसकेको दाबी गरे ।
यादवका अनुसार आठ जिल्लामा सीमित वर्तमान मधेस प्रदेशमा शासन र प्रशासनमा मधेशबाहिरका व्यक्तिको प्रभाव रहेको छ । उनले प्रदेशको प्रहरी, न्यायालय तथा प्रशासनिक संयन्त्रमा मधेसमै जन्मिएका मधेसी समुदायको निर्णायक सहभागिता हुनुपर्ने धारणा राखे । उनले संघीयताको वास्तविक मर्म प्रदेशमा आफ्नै शासन र प्रशासन तथा केन्द्रमा समान हिस्सेदारी सुनिश्चित हुनु रहेको तर्क गरे । यही अधिकार प्राप्तिका लागि अब मधेसी जनता फेरि संघर्षको बाटोमा उत्रिनुपर्ने उनको भनाइ थियो ।
‘अधिकार कसैले किस्तामा सजाएर दिँदैन, अधिकार लडेरै लिनुपर्छ,’ यादवले कार्यकर्तालाई सम्बोधन गर्दै भने । यादवले मुलुकको वर्तमान राजनीतिक संकटका लागि नेपाली कांग्रेस र कम्युनिष्ट दलहरू जिम्मेवार रहेको आरोपसमेत लगाए । विगतमा यी शक्तिहरूले सत्ता सहकार्य गर्दै मधेशी समुदायको माग र संघीयतालाई पर्याप्त रूपमा सम्बोधन नगरेको उनको दाबी थियो ।
मधेश आन्दोलनकै दबाबका कारण कांग्रेस र कम्युनिष्ट शक्तिहरू संघीय गणतन्त्र स्वीकार गर्न बाध्य भएको दाबी गर्दै यादवले अहिले पनि केही राजनीतिक शक्तिबाट संघीयता र गणतन्त्रविरुद्धका गतिविधि भइरहेको आरोप लगाए । उनले नेपालमा आफूलाई कम्युनिष्ट भन्ने दलहरू सिद्धान्तबाट विचलित भएको टिप्पणी पनि गरे ।
यादवले राष्ट्रिय स्वतन्त्र पार्टी (रास्वपा) र त्यसका नेताहरूमाथि पनि संघीयताका विषयमा दोहोरो धारणा राखेको आरोप लगाए । उनका अनुसार रास्वपाका नेताहरूले मधेशमा संघीयता सुदृढ गर्नुपर्ने धारणा राख्ने तर अन्य क्षेत्रमा प्रदेश संरचना खारेज गर्नुपर्ने अभिव्यक्ति दिने गरेको उनको दाबी थियो ।
‘रास्वपाभित्रैको असहयोगले सरकार कमजोर’ : प्रभु साह
कार्यक्रममा आम जनता पार्टी (आजपा)का अध्यक्ष तथा पूर्वमन्त्री प्रभु साहले प्रधानमन्त्री बालेन्द्र शाह नेतृत्वको सरकार संसद्को संख्यात्मक बलका हिसाबले शक्तिशाली भएपनि व्यवहारमा कमजोर देखिएको टिप्पणी गरे । उनले सरकारलाई विपक्षीभन्दा पनि रास्वपाभित्रैबाट असहयोग भइरहेको दाबी गरे । यस्तै धारणा शनिबार वीरगंजमा आयोजित सोही कार्यक्रमबारे प्रकाशित अन्य समाचारमा पनि उल्लेख छ ।
साहले सुनसरीको देवानगञ्जमा भएको धार्मिक तनावदेखि रसुवाको भोटेकोशी बाढीपछिको विपत्तिसम्मका घटनामा रास्वपा नेतृत्वले प्रधानमन्त्रीलाई ‘बाइपास’ गर्दै गतिविधि गरेको आरोप लगाए । विदेश सम्बन्ध तथा कूटनीतिक अभ्यासमा समेत प्रधानमन्त्री शाह र रास्वपा सभापति रवि लामिछानेबीच फरक दिशामा गतिविधि भइरहेको उनको दाबी थियो ।
लामिछानेले समानान्तर रूपमा सरकार सञ्चालन गर्न खोज्दा कार्यसम्पादनमा असर परेको भन्ने गुनासो आउन थालेको साहले बताए । उनले प्रधानमन्त्री शाहलाई जनताको भरोसामा रहेर संविधान र विधिको आधारमा सरकार सञ्चालन गर्न सुझावसमेत दिए ।
कार्यक्रममा जनमत पार्टीका अध्यक्ष डा. सीके राउत, प्रगतिशील लोकतान्त्रिक मोर्चाका नेता जनार्दन शर्मा लगायतले पनि सम्बोधन गरेका थिए । ९ दलीय अग्रगामी मोर्चाले मधेशमा संगठन विस्तार, कार्यकर्ता परिचालन तथा आफ्ना राजनीतिक एजेन्डालाई स्थानीय तहसम्म पुर्याउने उद्देश्यसहित प्रदेशस्तरीय कार्यक्रम सञ्चालन गरिरहेको जनाएको छ ।
प्रतिक्रिया दिनुहोस् !