जनकपुरधाम (धनुषा), २ असोज । मधेशको लाइफलाइन मानिएको हुलाकी राजमार्गअन्तर्गत धनुषा–सिरहा जोड्ने कमला नदीको पुल निर्माण अन्तिम चरणमा पुगेको छ । करिब १५ वर्षदेखि रुग्ण आयोजनाका रूपमा रहेको पुललाई अब दुई महिनाभित्र औपचारिक रूपमा सञ्चालनमा ल्याउने तयारी गरिएको छ ।
निर्माण कम्पनी र बीमा कम्पनीबीचको कानुनी विवाद तथा पुलको पिलर भाँचिएपछि लामो समयदेखि रोकिएको निर्माण कार्य सरकारले मुख्य समस्या पहिचान गरी आवश्यक सहजीकरण गरेपछि अघि बढेको हो । नदीमा भाँचिएको १० नम्बर पिलरको पुनर्निर्माण सम्पन्न भइसकेको छ । सब–स्ट्रक्चरको ढलान, फाउन्डेसनसहित तीनवटा पिलरको सबलीकरण तथा पुलको लोड परीक्षणसमेत पूरा भएको मन्त्रालयले जनाएको छ । अब सुपर स्ट्रक्चरको स्ल्याबमाथि ढलान गर्ने काम मात्रै बाँकी रहेको छ ।
नदीमा पानीको सतह घटेपछि आगामी हप्ताबाट बाँकी ढलानको काम अघि बढाइनेछ । धनुषातर्फ पुलसम्म पुग्ने पहुँच सडकमा भरिएको माटो वर्षाको पानीले बगाएपछि क्षति पुगेको छ । पानीको सतह घटेपछि पुनः माटो भर्ने काम गरिनेछ । सिराहातर्फको पहुँच सडकमा भने माटो भर्ने काम सम्पन्न भइसकेको छ । कमला पुल निर्माणका लागि २०६८ सालमा पप्पु लुम्बिनी जेभीले ठेक्का पाएको थियो ।
२०७८ साल असारमा पुल उद्घाटनको तयारी भइरहेका बेला पिलर भाँचिएपछि आयोजना लामो समयदेखि रुग्ण अवस्थामा थियो । यसैबीच, मन्त्रालयले पुलसँगै कमला नदी नियन्त्रणको कामसमेत अघि बढाएको छ । नदी नियन्त्रणका लागि सरकारले २५ करोड रुपैयाँ बजेट सुनिश्चित गरेको छ । डिजाइन स्वीकृत गरी आह्वान गरिएको टेन्डरमा जेभीसहित १९ वटा निर्माण कम्पनी सहभागी भएका छन् । आगामी हप्तासम्म प्राविधिक मूल्याङ्कन सकेर आर्थिक प्रस्ताव खोल्ने तयारी मन्त्रालयको छ ।
प्रतिक्रिया दिनुहोस् !