वीरगंज (पर्सा), ३१ भदौ । राष्ट्रिय स्वतन्त्र पार्टी (रास्वपा) संसदीय दलले पटक–पटक ताकेता गर्दा पनि निर्धारित समयभित्र सम्पत्ति विवरण नबुझाउने आफ्ना २४ जना सांसदको नाम सार्वजनिक गरेको छ । पार्टीका अनुसार सूचना प्रवाह, फलोअप तथा संसद् सचिवालयमार्फत एसएमएस पठाएर पटक–पटक जानकारी गराउँदासमेत ती सांसदले सम्पत्ति विवरण बुझाएका छैनन् ।
सार्वजनिक गरिएको सूचीमा पर्सा क्षेत्र नम्बर ३ का सांसद रामाकान्त प्रसाद चौरसियासहित आशा झा, कन्हैया बनिया, कामिनी कुमारी, कुसुम महर्जनलगायतका सांसद छन् । चौरसियाको नाम संघीय संसद्को सदस्य विवरणमा पर्सा–३ बाट रास्वपाका प्रत्यक्ष निर्वाचित सांसदका रूपमा पनि उल्लेख छ ।
सम्पत्ति विवरण बुझाउनुपर्ने विषय सार्वजनिक पद धारण गरेका व्यक्तिको कानुनी दायित्वसँग जोडिएको छ । संसद् सचिवालयले पनि सम्बन्धित कानुनी प्रावधानअनुसार सांसदहरूलाई सम्पत्ति विवरण बुझाउन सूचना जारी गर्दै आएको देखिन्छ । रास्वपाले आफ्ना सांसदहरूलाई विवरण बुझाउन निरन्तर सचेत गराउँदै आए पनि २४ सांसदले विवरण नबुझाएपछि उनीहरूको नाम नै सार्वजनिक गर्नुपरेको जनाएको छ । यस घटनाले सांसदहरूको कानुनी दायित्व पालना तथा सार्वजनिक पदमा पारदर्शिताको विषयलाई पुनः बहसमा ल्याएको छ ।
सम्पत्ति विवरण नबुझाउने विषयलाई लिएर सम्बन्धित सांसदहरूले विवरण किन बुझाएनन् भन्ने व्यक्तिगत कारण भने सार्वजनिक सूचीबाट स्पष्ट हुँदैन। त्यसैले नाम सार्वजनिक हुनु आफैंमा ती सांसदले गैरकानुनी सम्पत्ति राखेको वा कुनै आर्थिक अनियमितता गरेको प्रमाण भने होइन । रास्वपाले बाँकी सांसदलाई समेत तत्काल सम्पत्ति विवरण बुझाउन आग्रह गरेको छ ।
प्रतिक्रिया दिनुहोस् !