जनकपुरधाम (धनुषा), ३१ भदौ । मधेस प्रदेशका शिक्षा तथा संस्कृति मन्त्री मनोज सिंहले बालबालिका तथा विद्यार्थीमा लगानी नगरे नेपाल निर्माणको सपना र दिगो विकासको लक्ष्य पूरा हुन नसक्ने बताएका छन् । ६२औँ राष्ट्रिय बाल दिवसको अवसरमा आयोजित कार्यक्रममा बोल्दै मन्त्री सिंहले बालबालिकामा लगानी नगरे जुनसुकै राजनीतिक दल वा सरकार आए पनि देश विकासको लक्ष्य पूरा हुन नसक्ने स्पष्ट पारे ।
उनले सामुदायिक विद्यालयलाई सबै वर्ग र समुदायको साझा विद्यालय बनाउनुपर्नेमा जोड दिए । सामुदायिक विद्यालयलाई साझा विद्यालय कसरी बनाउन सकिन्छ भन्ने दिशामा काम गर्न आवश्यक रहेको उनको भनाइ थियो । ‘सामुदायिक विद्यालयलाई साझा विद्यालय बनाउने कुरा कानून बनाएर मात्र होइन, व्यवहारमै लागू गरेर पूरा गर्न सकिन्छ,’ मन्त्री सिंहले भने ।
मन्त्री सिंहले विगतमा मधेसले शिक्षाको ज्योति बाल्दै पहाड र हिमालसम्म पुर्याएको स्मरण गरे । त्यसबेला मधेसको अर्थतन्त्रमा समेत शिक्षाको महत्वपूर्ण प्रभाव रहेको उल्लेख गर्दै उनले शिक्षकहरूको तलब तराई मधेसका लागि नगदी आम्दानीको महत्वपूर्ण स्रोत रहेको बताए । ‘हिजोका दिनमा मधेस शिक्षाको ज्योति बाल्दै पहाड हिमालसम्म पुग्थ्यो । यसले मधेसको अर्थतन्त्रमा पनि राम्रो प्रभाव पार्थ्यो । हिजोको नगदी आम्दानी तराई मधेसका लागि शिक्षकहरूको तलब नै थियो । तर आज हामी त्यो अवस्थामा छैनौँ,’ उनले भने ।
कार्यक्रममा मन्त्री सिंहले पछिल्लो समय किशोर पुस्ता कुलत तथा लागुऔषधको फन्दामा पर्दै गएकोप्रति चिन्ता व्यक्त गरे । विद्यालय तथा कलेज सञ्चालनमा आए पनि त्यहाँ आउने किशोरकिशोरीलाई कुलत र लागुऔषधबाट जोगाउने दिशामा शिक्षकहरूले समेत भूमिका निर्वाह गर्नुपर्ने उनको भनाइ थियो । आउँदो पुस्तालाई सही दिशामा डोर्याउन शिक्षकहरूले नैतिक शिक्षा दिनुपर्नेमा जोड दिँदै उनले सामाजिक तथा राजनीतिक परिवर्तनमा विगतमा गुरुहरूको महत्वपूर्ण भूमिका रहेको र अहिले पनि देशलाई गुरुहरूको सही मार्गदर्शन आवश्यक रहेको बताए ।
कार्यक्रममा हाजिरी जवाफ, वादविवाद सहितका प्रतियोगिताहरुको आयोजना समेत गरिएको थियो । कञ्चनवन बाल क्लवका अध्यक्ष निकिता यादवको अध्यक्षतामा भएको कार्यक्रममा भंगहाका नगर उपप्रमुख शान्ति सिंह, भंगहा ९का वडाध्यक्ष राजाबाबु यादव, गुड नेइवर्स इन्टरनेसनल नेपालका मूल्यांकन तथा अनुगमन अधिकृत किरण श्रेष्ठ, तारा घिमिरे सहितको उपस्थिति रहेको थियो ।
प्रतिक्रिया दिनुहोस् !