वीरगंज (पर्सा), ३० भदौ । संघीय मामिला तथा सामान्य प्रशासन मन्त्रालयले गरेको ठूलो संख्याको कर्मचारी सरुवाको असर पर्सा र बाराका स्थानीय तहमा समेत परेको छ । भूमि व्यवस्था, सहकारी तथा गरिबी निवारण मन्त्रालय तथा संघीय मामिला तथा सामान्य प्रशासन मन्त्रालयले गरेको ९ उपसचिव र ५२ अधिकृतको सरुवा अन्तर्गत पर्सा र बाराका विभिन्न गाउँपालिकाका प्रमुख प्रशासकीय अधिकृत फेरिएका हुन् ।
सरुवा सूचीअनुसार पर्साको सखुवा प्रसौनी गाउँपालिकाका प्रमुख प्रशासकीय अधिकृत संजीव कुमार यादवलाई धोबिनी गाउँपालिकामा सरुवा गरिएको छ । उनको स्थानमा सर्लाहीको चक्रघट्टा गाउँपालिकामा कार्यरत प्रमुख प्रशासकीय अधिकृत रामबाबु कुशवाहालाई सखुवा प्रसौनी पठाइएको छ । कुशवाहाको स्थानमा भने जिल्ला प्रशासन कार्यालय पर्सामा कार्यरत शाखा अधिकृत विनय गुप्तालाई चक्रघट्टा गाउँपालिकाको प्रमुख प्रशासकीय अधिकृतको जिम्मेवारी दिइएको छ ।
त्यस्तै, धोबिनी गाउँपालिकाका प्रमुख प्रशासकीय अधिकृत कृष्ण खतिवडालाई जिराभवानी गाउँपालिकामा सरुवा गरिएको छ । जिराभवानीका प्रमुख प्रशासकीय अधिकृत अमित कुमार गिरीको गृह मन्त्रालयअन्तर्गत सरुवा भएको छ । पर्साको पटेर्वा सुगौली गाउँपालिकाका प्रमुख प्रशासकीय अधिकृत प्राण मेहता पनि गृह मन्त्रालयअन्तर्गत सरुवा भएका छन् । उनको ठाउँमा रौतहटको ईशनाथ नगरपालिकाका प्रमुख प्रशासकीय अधिकृत महमद नवाज हुसैनलाई पठाइएको छ ।
पर्साकै जगरनाथपुर गाउँपालिकाका प्रमुख प्रशासकीय अधिकृत सन्देश कुमार यादवलाई बाराको विश्रामपुर गाउँपालिकामा सरुवा गरिएको छ । विश्रामपुरका प्रमुख प्रशासकीय अधिकृत सुनिल प्रसाद केशरीलाई भने जगरनाथपुर गाउँपालिकाको प्रमुख प्रशासकीय अधिकृतको जिम्मेवारी दिइएको छ ।
यसैगरी छिपहरमाई गाउँपालिकाका प्रमुख प्रशासकीय अधिकृत संजीव कुमार साहको सर्लाहीस्थित पर्सा गाउँपालिकामा सरुवा भएको छ । उनको ठाउँमा सर्वजित कुमार झालाई पठाइएको छ । पर्साको पकहाँ मैनपुर गाउँपालिकाका प्रमुख प्रशासकीय अधिकृत देवनाथ साहको पनि गृह मन्त्रालयअन्तर्गत सरुवा भएको छ । उनको स्थानमा जिल्ला समन्वय समिति पर्सामा कार्यरत सुमित कुमार सिंहलाई प्रमुख प्रशासकीय अधिकृतको जिम्मेवारी दिइएको छ ।
बारामा पनि व्यापक हेरफेर
बाराका स्थानीय तहमा पनि सरुवाले प्रशासकीय नेतृत्वमा उल्लेख्य परिवर्तन ल्याएको छ । परवानीपुर गाउँपालिकाका प्रमुख प्रशासकीय अधिकृत मुन्ना कुमार रौनियारलाई फेटा गाउँपालिकामा सरुवा गरिएको छ । फेटाका प्रमुख प्रशासकीय अधिकृत राकेश ओझाको सिरहाको नवराजपुर गाउँपालिकामा सरुवा भएको छ ।
परवानीपुर गाउँपालिकाको नयाँ प्रमुख प्रशासकीय अधिकृतका रूपमा बाराकै देवताल गाउँपालिकामा कार्यरत कृष्णनन्दन रायलाई पठाइएको छ । रायको स्थानमा रौतहटको बौद्धिमाई नगरपालिकाका प्रमुख प्रशासकीय अधिकृत उदयशंकर चौधरीलाई देवताल गाउँपालिकाको जिम्मेवारी दिइएको छ । बाराको प्रसौनी गाउँपालिकाका प्रमुख प्रशासकीय अधिकृत नवीन कुमार श्रीवास्तवको गृह मन्त्रालयअन्तर्गत सरुवा भएको छ । उनको स्थानमा रौतहटको देवाही गोनाही नगरपालिकामा कार्यरत पवन कुमार केशरीलाई पठाइएको छ ।
त्यस्तै, करैयामाई गाउँपालिकाका प्रमुख प्रशासकीय अधिकृत नागेन्द्र यादवको भूमि व्यवस्था तथा अभिलेख विभाग, काठमाडौंमा सरुवा गरिएको छ । करैयामाईको नयाँ प्रमुख प्रशासकीय अधिकृतका रूपमा रमेश अधिकारीलाई पठाइएको छ । पर्सा र बाराका स्थानीय तहमा भएको यो सरुवासँगै विकास योजना कार्यान्वयन, प्रशासनिक सेवा प्रवाह, बजेट कार्यान्वयन तथा कार्यालय व्यवस्थापनमा समेत नयाँ नेतृत्वको प्रभाव पर्ने देखिएको छ ।
प्रमुख प्रशासकीय अधिकृत स्थानीय तहको प्रशासनिक संयन्त्रका प्रमुख हुने भएकाले उनीहरूको फेरबदलले पालिकाको दैनिक प्रशासनदेखि विकास निर्माण र आर्थिक गतिविधिसम्म प्रत्यक्ष प्रभाव पार्ने गर्छ । एकैपटक ठूलो संख्यामा प्रमुख प्रशासकीय अधिकृत परिवर्तन भएपछि अब नयाँ जिम्मेवारी पाएका अधिकारीहरूले स्थानीय तहको प्रशासनलाई कति प्रभावकारी, पारदर्शी र परिणाममुखी बनाउन सक्छन् भन्ने विषयमा समेत चासो बढेको छ ।
प्रतिक्रिया दिनुहोस् !