वीरगंज (पर्सा), २८ भदौ । नेपाली हिन्दु नारीहरूको महान् पर्व हरितालिका तीजअन्तर्गत आज दर खाने दिन मनाइँदैछ । भाद्र शुक्ल द्वितीयाका दिन आज राति दर खाएसँगै चार दिनसम्म मनाइने तीज पर्वको औपचारिक सुरुआत भएको हो । परम्पराअनुसार माइती तथा दाजुभाइले छोरीचेली र दिदीबहिनीलाई बोलाएर दर खुवाउने चलन छ ।
दरका रूपमा दूधबाट बनेका परिकार, गहुँको रोटी र घिउलगायतका शुद्ध परिकार खाने धार्मीक परम्परा रहेको छ । पछिल्लो समय तीजको रौनक काठमाडौं उपत्यका र पहाडी क्षेत्रसँगै तराई–मधेशमा समेत बढ्दै गएको छ । तराई–मधेशका विभिन्न स्थानमा पनि महिलाहरू समूह बनाएर तीजका गीत गाउँदै, नाच्दै र दर खाने कार्यक्रम आयोजना गर्न थालेका छन् । तीजलाई महिलाहरूले वर्षभरिका दुःख, पीर र मर्का गीत तथा नृत्यमार्फत पोख्ने अवसरका रूपमा समेत मनाउँदै आएका छन् ।
यसैबिच, मधेशी समुदायको महत्त्वपूर्ण धार्मिक तथा सांस्कृतिक पर्व चौरचनको अवसरमा धनुषाका दुई स्थानीय तहले स्थानीय बिदा दिने निर्णय गरेका छन् । जनकपुरधाम उपमहानगरपालिका र कमला नगरपालिकाले भोली सोमबार मनाइने चौरचन पर्वका अवसरमा आफ्नो क्षेत्रभित्र स्थानीय बिदा दिने निर्णय गरेका हुन् । चौरचन पर्वलाई धार्मिक तथा सांस्कृतिक रूपमा महत्त्वपूर्ण पर्वका रूपमा मनाउने गरिन्छ । यस पर्वमा भगवान गणेश र चन्द्रमाको पूजा गरी परिवारको सुख, शान्ति, समृद्धि र दीर्घायुको कामना गर्ने परम्परा रहेको छ ।
प्रतिक्रिया दिनुहोस् !