वीरगंज (पर्सा), १० भदौ । रसुवाको भोटेकोशी नदीमा आएको भीषण बाढीले ठूलो जनधनको क्षति पुर्याएपछि नेपाली कम्युनिष्ट पार्टी पर्साले नदी तटीय क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ । बाढीको बहाव र जोखिम अझै कायमै रहेकाले सम्भावित थप क्षतिबाट जोगिन विशेष सावधानी अपनाउन पार्टीले अपिल गरेको हो । पार्टीका पर्सा जिल्ला संयोजक जयप्रकाश थारूले बुधबार जारी गरेको विज्ञप्तिमा रसुवा, नुवाकोट र धादिङका रसुवागढी, टिमुरे, स्याफ्रु, मैलुङ तथा बेत्रावतीलगायत क्षेत्रमा बाढीले व्यापक मानवीय तथा भौतिक क्षति पुर्याएको उल्लेख छ ।
बुधबार बिहान करिब सवा ९ बजे तिब्बततर्फबाट भोटेकोशी नदीमा एक्कासि आएको बाढीले प्रभावित क्षेत्रमा रहेका नागरिक, सुरक्षाकर्मी र कर्मचारीसमेत सम्पर्कविहीन भएको पार्टीले जनाएको छ । बाढीका कारण केही व्यक्ति घाइते हुनुका साथै ठूलो संख्यामा घर तथा पसलमा क्षति पुगेको विज्ञप्तिमा उल्लेख गरिएको छ ।
बाढीले बजारदेखि भन्सार र विद्युत् संरचनासम्म क्षति
बाढीको चपेटामा टिमुरे बजारसहितका क्षेत्रका घर, पसल र पशुचौपाया परेका छन् । त्यस्तै, भन्सार कार्यालय, प्रहरी चौकी, टेलिकम टावर, सडक तथा पुलमा समेत क्षति पुगेको पार्टीले जनाएको छ । बाढीले जलविद्युत् आयोजना, विद्युत् गृह तथा सबस्टेसन र खेतबारीमा समेत क्षति पुर्याएको उल्लेख गर्दै पार्टीले विपद्को अवस्था गम्भीर रहेको जनाएको छ ।
भोटेकोशीसँगै त्रिशूली नदीमा पनि बाढीको जोखिम अझै कायम रहेको भन्दै रसुवा, नुवाकोट, धादिङ, गोरखा र चितवनका नदी तटीय क्षेत्रका नागरिकलाई विशेष सावधानी अपनाउन पार्टीले आग्रह गरेको छ ।
‘जोखिमपूर्ण यात्रा नगर्नुस्, सुरक्षित स्थानमा बस्नुस्’
पार्टी संयोजक थारूले नदी आसपास बसोबास गर्ने नागरिकलाई सम्भावित जोखिमलाई बेवास्ता नगर्न आग्रह गरेका छन् । उनले सुरक्षित स्थानमा रहन, जोखिमपूर्ण यात्रा नगर्न तथा स्थानीय प्रशासन र सुरक्षा निकायले जारी गर्ने निर्देशन अनिवार्य रूपमा पालना गर्न अपिल गरेका छन् । विपद्का बेला नागरिकको जीवनरक्षा राज्यको पहिलो प्राथमिकता हुनुपर्ने भन्दै पार्टीले प्रभावित क्षेत्रमा तत्काल उद्धार तथा राहतका लागि राज्यका सम्पूर्ण विपद् व्यवस्थापन संयन्त्र, उपलब्ध साधन–स्रोत र आवश्यक वैकल्पिक उपाय परिचालन गर्न सरकारसँग माग गरेको छ ।
उद्धारमा सबै संयन्त्र परिचालन गर्न माग
बाढीमा फसेका नागरिकको खोजी तथा उद्धार, घाइतेको उपचार र प्रभावित परिवारसम्म राहत पुर्याउने कामलाई प्रभावकारी बनाउन संघ, प्रदेश र स्थानीय सरकारबीच तत्काल समन्वय आवश्यक रहेको पार्टीले जनाएको छ । त्यसका लागि जनप्रतिनिधि, सुरक्षा निकाय, राजनीतिक दल, नागरिक समाज तथा विभिन्न सामाजिक संघ–संस्थाबीच सहकार्य र समन्वय बढाउन पनि नेकपा पर्साले आग्रह गरेको छ ।
बाढीबाट प्रभावित नागरिकलाई तत्काल उद्धार गरी सुरक्षित स्थानमा पुर्याउनु अहिलेको प्रमुख आवश्यकता रहेको उल्लेख गर्दै पार्टीले विपद्को समयमा राजनीतिक तथा सामाजिक क्षेत्रका सबै पक्ष एकजुट भएर मानवीय सेवामा केन्द्रित हुनुपर्नेमा जोड दिएको छ । ‘सबै सुरक्षित रहौं, एकजुट भएर उद्धार, राहत र मानवीय सेवामा जुटौं’, विज्ञप्तिमार्फत पार्टीले अपिल गरेको छ ।
प्रतिक्रिया दिनुहोस् !