रक्सौल (विहार), ९ भदौ । भारतको रक्सौल नगर परिषद् क्षेत्रअन्तर्गत हरैया थाना क्षेत्रमा प्रेमसम्बन्धी विषयलाई लिएर मंगलबार बिहान एक युवती मोबाइल टावरमा चढेपछि तनावको अवस्था सिर्जना भएको छ । प्रेमीले आफूलाई स्वीकार गर्न नमानेको भन्दै युवती हातमा चक्कु लिएर टावरमा चढेकी थिइन् । परेऊँवा निवासी रुबी नामकी युवती आदापुर निवासी विवेकसँग प्रेमसम्बन्धमा रहेको बताइएको छ ।
युवतीले विवेक आफूलाई स्वीकार गर्न तयार नभएको आरोप लगाउँदै विवाह गराइदिन माग गरेकी थिइन् । प्रेमसम्बन्धको विषयमा उनले परिवार तथा जनप्रतिनिधिसँग समेत सहयोग मागे पनि समस्या समाधान नभएपछि मंगलबार बिहान करिब ७ बजे बौद्धी माई मन्दिर नजिकै एक निजी विद्यालयको छेउमा रहेको एयरटेलको मोबाइल टावरमा चढेको बताइएको छ । टावरमा चढेकी युवतीले हातमा चक्कु बोकेर आत्महत्या गर्ने धम्की दिँदै आफूलाई प्रेमीसँग विवाह गराइदिन माग गरिरहेकी थिइन् ।
घटनाको जानकारी पाएलगत्तै हरैया थानाध्यक्ष किशनकुमार प्रहरी टोलीसहित घटनास्थल पुगेका थिए । त्यसपछि सीओ अरविन्दकुमारसमेत घटनास्थलमा पुगेर स्थिति नियन्त्रणमा लिन पहल गरेका थिए । प्रहरीले माइकिङ गर्दै युवतीलाई टावरबाट सुरक्षित रूपमा तल झर्न आग्रह गरेको थियो । लामो समयसम्म सम्झाइबुझाइ गरेपछि करिब ९ः३० बजे उनी तल झर्न तयार भएकी थिइन् ।
प्रहरी–प्रशासनले उनको कुरा सुन्ने र आवश्यक पहल गर्ने आश्वासन दिएपछि युवती सामान्य अवस्थामा आएकी थिइन् । त्यसपछि प्रहरी टोलीले उनलाई सुरक्षित रूपमा टावरबाट उद्धार गरेको थियो । घटनास्थलमा युवतीलाई हेर्न ठूलो संख्यामा स्थानीयको भीड जम्मा भएको थियो । करिब साढे दुई घण्टासम्म चलेको उद्धार तथा सम्झाइबुझाइ अभियान सफल भएपछि प्रहरी–प्रशासनले राहतको सास फेरेको थियो ।
समाजसेवी रञ्जित सिंहले प्रहरी–प्रशासनले घटनामा संयमता र सूझबुझका साथ काम गरेको बताए । वडा नं. १ का पार्षद ओमकुमार साहले समेत युवतीलाई सुरक्षित उद्धार गर्न प्रहरी प्रशासनले खेलेको भूमिकाको प्रशंसा गरेका छन् । प्रहरीले युवतीको मानसिक अवस्था तथा प्रेमसम्बन्धसँग जोडिएको घटनाबारे थप अनुसन्धान भइरहेको जनाएको छ ।
प्रतिक्रिया दिनुहोस् !