वीरगंज (पर्सा), १३ साउन । पर्साको जिराभवानी गाउँपालिकाका अध्यक्ष अनोज चौधरी जनतासँगको पूर्वनिर्धारित खुला संवाद कार्यक्रममा अनुपस्थित भएपछि आक्रोशित स्थानीय युवा तथा सर्वसाधारणले अध्यक्षको कार्यकक्षमा ताल्चा लगाएका छन् । जनप्रतिनिधिहरू प्रत्यक्ष रूपमा जनताको प्रश्नको सामना गर्न नआएको भन्दै स्थानीयले विरोधस्वरूप यस्तो कदम चालेका हुन् ।
स्थानीय युवाहरूले गाउँपालिका अध्यक्ष अनोज चौधरी, उपाध्यक्ष रेखा चौधरी, प्रमुख प्रशासकीय अधिकृत अमित कुमार गिरी तथा सबै वडाध्यक्षलाई गाउँपालिकासँग सम्बन्धित जनसरोकारका विषयमा खुला छलफलका लागि तोकिएको समयमै उपस्थित हुन आग्रह गरेका थिए । तर, निर्धारित समयमा अध्यक्षसहित जनप्रतिनिधिहरू उपस्थित नभएपछि स्थानीयले अध्यक्षको कार्यकक्षमा ताल्चा लगाएका हुन् । स्थानीय युवा कृष्ण चौधरीका अनुसार जनतासँग प्रत्यक्ष संवाद कार्यक्रम सञ्चालन गर्न साउन ४ गते गाउँपालिकामा औपचारिक रूपमा प्रस्ताव दर्ता गरिएको थियो ।
सोही प्रस्तावअनुसार साउन १३ गते संवाद कार्यक्रम तय भए पनि जनप्रतिनिधिहरू अनुपस्थित रहेकाले विरोधस्वरूप ताल्चा लगाउन बाध्य भएको उनले बताए । स्थानीयवासीहरूले विकास निर्माण, शिक्षा, स्वास्थ्य, कृषि, खानेपानी, सडक पूर्वाधार तथा सामाजिक सुरक्षालगायत गाउँपालिकासँग सम्बन्धित अनेकौं विषयमा आफ्ना गुनासा, जिज्ञासा र प्रश्न प्रत्यक्ष रूपमा जनप्रतिनिधिसमक्ष राख्न चाहेको बताएका छन् । उनीहरूका अनुसार जनप्रतिनिधि जनताको बीचमा आएर खुला संवाद नगरेसम्म अध्यक्षको कार्यकक्षमा लगाइएको ताल्चा नखोलिने अडान कायम रहनेछ ।
यता गाउँपालिकाका प्रमुख प्रशासकीय अधिकृत अमित कुमार गिरीले दर्ता भएको प्रस्तावबारे सबै जनप्रतिनिधिलाई समयमै जानकारी गराइएको बताए । उनका अनुसार कार्यालयका कर्मचारीहरू नियमित रूपमा उपस्थित रहे पनि जनप्रतिनिधिलाई उपस्थित हुन निर्देशन दिने कानुनी अधिकार कर्मचारीसँग नरहेको स्पष्ट पारे । प्रमुख प्रशासकीय अधिकृत गिरीले गाउँपालिका अध्यक्षबाट टेलिफोनमार्फत प्राप्त निर्देशनअनुसार आगामी साउन १८ गते सोमबार जनतासँग खुला संवाद कार्यक्रम आयोजना गरिने जानकारी दिएका छन् ।
प्रतिक्रिया दिनुहोस् !