वीरगंज (पर्सा), १२ साउन । वीरगंजस्थित नारायणी अस्पतालका चिकित्सक तथा स्वास्थ्यकर्मीमाथि भएको साङ्घातिक आक्रमण, अस्पतालभित्रको तोडफोड तथा जिल्ला प्रशासन कार्यालय पर्सामा वार्ताकै क्रममा चिकित्सकहरूमाथि भएको भनिएको प्रहरी दुर्व्यवहारको विरोधमा नेपाल चिकित्सक संघले मंगलबार देशभरका अस्पताल तथा स्वास्थ्य संस्थामा आकस्मिकबाहेकका सम्पूर्ण सेवा बन्द गरेको छ ।
संघले सोमबार सार्वजनिक गरेको विज्ञप्तिअनुसार साउन १२ गते देशव्यापी रूपमा आकस्मिक सेवा बाहेकका सबै स्वास्थ्य सेवा स्थगित गर्ने निर्णय गरिएको हो । चिकित्सक तथा स्वास्थ्यकर्मीको सुरक्षामाथि बारम्बार आक्रमण भइरहँदा सरकारले प्रभावकारी सुरक्षा दिन नसकेको निष्कर्षसहित संघ आन्दोलनमा उत्रिएको जनाएको छ ।
गत साउन ९ गते नारायणी अस्पतालमा कार्यरत डा. प्रमोद रामसहित चिकित्सक तथा स्वास्थ्यकर्मीमाथि आक्रमण भएको थियो । घटनामा डा. रामको टाउकोमा गम्भीर चोट लागेको र उनी हाल उपचाररत रहेको संघले जनाएको छ । आक्रमणसँगै अस्पताल परिसरमा समेत व्यापक तोडफोड गरिएको थियो ।
घटनाका दोषीमाथि कानुनी कारबाहीको माग गर्दै सोमबार जिल्ला प्रशासन कार्यालय पर्सामा भइरहेको छलफलका क्रममा प्रमुख जिल्ला अधिकारीको उपस्थितिमै प्रहरी प्रमुखले प्रहरी परिचालन गरी संघका केन्द्रीय कार्यकारिणी समिति सदस्य, नारायणी शाखाका अध्यक्षलगायत चिकित्सकहरूमाथि गालीगलौज र दुर्व्यवहार गरेको आरोप चिकित्सक संघले लगाएको छ । उक्त घटनालाई संघले चिकित्सक समुदायमाथिको गम्भीर अपमान र अस्वीकार्य व्यवहार भन्दै कडा शब्दमा भत्र्सना गरेको छ ।
संघले अस्पतालमा आक्रमण तथा तोडफोडमा संलग्न सबैलाई तत्काल पक्राउ गरी ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९)’ बमोजिम कडा कारबाही गर्न सरकारसँग माग गरेको छ । साथै चिकित्सकहरूमाथि दुर्व्यवहार भएको आरोप लागेका पर्साका प्रमुख जिल्ला अधिकारी र प्रहरी प्रमुखमाथि पनि तत्काल छानबिन गरी आवश्यक कारबाही गर्नुपर्ने माग अघि सारेको छ ।
नेपाल चिकित्सक संघका अध्यक्ष डा. बद्री रिजाल र महासचिव डा. विश्वराज दवाडीद्वारा हस्ताक्षरित विज्ञप्तिमा आन्दोलनका कारण बिरामी तथा सेवाग्राहीमा पर्न गएको असुविधाप्रति क्षमायाचना गर्दै त्यसको सम्पूर्ण जिम्मेवारी नेपाल सरकारले लिनुपर्ने उल्लेख गरिएको छ ।
प्रतिक्रिया दिनुहोस् !