वीरगंज (पर्सा), २५ असार । किस्ताबन्दीमा घरायसी तथा विद्युतीय सामग्री उपलब्ध गराउने आश्वासन दिएर सर्वसाधारणबाट करोडौँ रुपैयाँ संकलन गरेको आरोपमा ‘अल्ट्रा अभियान डिजिटल वर्ल्ड’ का सञ्चालकविरुद्ध जिल्ला प्रशासन कार्यालय पर्सामा सामूहिक उजुरी दर्ता भएको छ । सेवाग्राही तथा बजार प्रतिनिधिहरूले आफूहरू आर्थिक रूपमा ठगिएको दाबी गर्दै दोषीमाथि कानुनी कारबाही र रकम फिर्ताको माग गरेका छन् ।
असार २३ गते दर्ता गरिएको उजुरीमा वीरगंजका सोनालाल पटेल, रामजी साह कलवार र जितेन्द्र पाण्डेसहितका पीडितहरूले संस्थाका सञ्चालक दीपेश बर्नवाल, सुशील सर्राफ, विष्णु काफ्ले र ऋषिकान्त गुप्तालाई विपक्षी बनाएका छन् । पीडितहरूका अनुसार करिब तीन वर्षअघि सञ्चालनमा आएको संस्थाले किस्ताबन्दी योजनाअन्तर्गत प्रत्येक सदस्यबाट ३१ हजार ७२५ रुपैयाँका दरले रकम उठाएको थियो । प्रारम्भिक चरणमा केही सदस्यलाई १२ देखि १५ हजार रुपैयाँ बराबरका विद्युतीय तथा घरायसी सामग्री उपलब्ध गराइएपनि अधिकांश सदस्यले भने अहिलेसम्म कुनै सामान प्राप्त गर्न नसकेको गुनासो गरेका छन् ।
उजुरीमा उल्लेख भएअनुसार सञ्चालकमध्ये दीपेश बर्नवाल, सुशील सर्राफ र विष्णु काफ्ले लामो समयदेखि सम्पर्कविहीन रहेको आरोप छ । अर्का साझेदार ऋषिकान्त गुप्ता वीरगंजमै रहेपनि पीडितहरूको समस्या समाधान गर्न वा बाँकी सामान उपलब्ध गराउनेतर्फ कुनै पहल नगरेको आरोप लगाइएको छ । साथै संस्थाका लेखापाल तथा सञ्चालक दीपेश बर्नवालका छोरा योगेश बर्नवालको भूमिकामाथि पनि प्रश्न उठाउँदै उनको नामसमेत उजुरीमा समावेश गरिएको एक बजार प्रतिनिधिले बताएका छन् ।
पीडितहरूको भनाइमा संस्थाभित्र सञ्चालकहरूबीच उत्पन्न भएको विवाद, आर्थिक अपारदर्शिता तथा व्यवस्थापनको कमजोरीका कारण सेवा नै प्रभावित भएको हो । हजारौँ सदस्यबाट रकम संकलन गरिएपनि संस्थाले गरेको प्रतिबद्धताअनुसार सामान वितरण नगर्दा सर्वसाधारण प्रत्यक्ष रूपमा मर्कामा परेको उनीहरूको आरोप छ ।
संस्थासँग आबद्ध बजार प्रतिनिधिहरूले पनि आफूहरू दोहोरो मारमा परेको बताएका छन् । संस्थाको विश्वासमा परेर सदस्य बनाएका सेवाग्राहीलाई अहिले सामान उपलब्ध गराउन नसक्दा उनीहरूले गालीगलौज, धम्की र मानसिक तनाव सहनुपरेको गुनासो गरेका छन् । आफूहरूले संकलन गरेको रकमको हिसाबकिताब तथा वितरण हुनुपर्ने सामानको विवरणसमेत नपाएको उनीहरूको दाबी छ ।
पीडित सेवाग्राही र बजार प्रतिनिधिहरूले आफूहरूबाट उठाइएको रकम फिर्ता गराउन, घटनाको निष्पक्ष छानबिन गर्न तथा संलग्न व्यक्तिमाथि प्रचलित कानुनअनुसार कडा कारबाही गर्न माग गर्दै जिल्ला प्रशासन कार्यालय पर्सामा सामूहिक उजुरी दिएका छन् ।
जिल्ला प्रशासन कार्यालय पर्साले प्राप्त उजुरीमाथि आवश्यक अनुसन्धान प्रक्रिया सुरु भएको जनाएको छ । प्रशासनका अनुसार घटनाको वास्तविक अवस्था, पीडितको संख्या तथा आर्थिक क्षतिको यकिन विवरण अनुसन्धानपछि मात्रै सार्वजनिक गरिनेछ । अनुसन्धानको निष्कर्षका आधारमा आवश्यक कानुनी प्रक्रिया अगाडि बढाइने प्रशासनको भनाइ छ ।
प्रतिक्रिया दिनुहोस् !