वीरगंज (पर्सा), २४ असार । पर्साको ठोरी र भिस्वा नाकाबाट भारतीय नम्बर प्लेटका सवारीसाधन नेपाल प्रवेश सुचारु भएको छ । ठोरी स्थीत अमृत छोटी भन्सारबाट भारतीय सवारी नेपाल प्रवेश मंगलबार देखि नै सुरु भएको हो भने भिस्वा नाकाबाट बुधवार देखि मात्रै सुचारु भएको हो । यस अघि बन्द रहेको दुवै छोटी भन्सार कार्यालयमा वीरगंज भन्सार कार्यालयले कर्मचारी पठाएर सञ्चालनमा ल्याएको हो ।
दुवै छोटी भन्सार कार्यालयलाई भारतीय सवारीको भन्सार अनुमति दिइएको वीरगंज भंसार कार्यालयले जनाएको छ । भारतबाट नेपाल प्रवेश गर्ने भारतीय सवारीले रात नविताई फर्कने हो भने शुल्क तिर्नु पर्दैन । शुल्क तिर्न नपरे पनि भंसार पुर्जी लिनुपर्ने व्यवस्था छ । नेपाली सवारी भारत प्रवेश गर्दा भने सिमा नजिकको भारतीय बजार, रेल्वे स्टेशन पुग्न वा रात नविताई फर्कनकालागि भारतीय भन्सार पास लिनु नपर्ने व्यवस्था रहिआएको वीरगंज स्थित भारतीय महाबाणिज्य दुतावासले जनाएको छ ।
यस अघि निर्वाध रुपमा नेपाल सीमावर्ती क्षेत्रमा भारतीय सवारी साधन प्रवेश गरि रहेको भएता पनि असार १९ गते शुक्रबारदेखि सशस्त्र सीमा सुरक्षा बलले भारतीय नम्बर प्लेटका चारपांग्रे सवारीसाधनको प्रवेश बन्द गराएको थियो । यसपछि स्थानीय व्यवसायी तथा सर्वसाधारण आन्दोलित भएका थिए । प्रतिनिधिसभाको बैठकमा पर्सा क्षेत्र नं ४ का सांसद टेकबहादुर शाक्यले ठोरी तथा भिस्वा–जानकीटोलाबाट भारतीय नम्बर प्लेटका चारपांग्रे सवारीसाधनको प्रवेशमा लगाइएको रोकप्रति सरकारको गम्भीर ध्यानाकर्षण गराएका थिए ।
ठोरीका पर्यटन व्यवसायीको टोलीले जिल्ला प्रशासन कार्यालय पुगेर ज्ञापनपत्रसमेत बुझाएको थियो भने भिस्वाका स्थानीय बासिन्दाले नाकामा धर्ना बसी आन्दोलन सुरु गरेको थिए । सो पछि भारतीय नम्बर प्लेटका चारपांग्रे सवारीसाधनको प्रवेश सहजीकरण गर्ने विषयमा सकारात्मक सहमति भएको हो । भन्सार कार्यालयका प्रतिनिधिका अनुसार भारतीय नम्बर प्लेटका सवारीसाधनले ठोरी र भिस्वा छोटी भन्सारबाट निःशुल्क सुविधा पास लिएपछि नेपाल तर्फका तथा आसपासका पर्यटकीय स्थलहरूको भ्रमण गर्न सक्नेछन् ।
प्रतिक्रिया दिनुहोस् !