वीरगंज (पर्सा), १० असार । पर्साको ठोरी गाउँपालिका–३ स्थित शिकारीबासमा जंगली हात्तीको बथानले पाँच दिनदेखि निरन्तर आतंक मच्चाएपछि स्थानीय किसान समस्यामा परेका छन् । भित्र्याउने तयारीमा रहेको चैते धानबाली हात्तीले नष्ट गर्न थालेपछि किसानको वर्षभरिको मेहनत जोखिममा परेको छ । स्थानीयका अनुसार राति ९ देखि १२ वटासम्मको हात्तीको समूह गाउँ नजिकका खेतमा पस्ने गरेको छ ।
किसान बमभोला महतो थारुले केही दिनयता हात्तीले पाकेको धानबालीमा व्यापक क्षति पुर्याइरहेको बताए । उनका अनुसार काट्ने तयारीमा पुगेको धान केही क्षणमै नष्ट हुँदा किसान निराश बनेका छन् । हात्तीको आक्रमणबाट बिगा चौधरी, दिलिप गौरो, सञ्जय चौधरीलगायतका किसानको करिब दुई कठ्ठा क्षेत्रफलमा लगाइएको धानबाली नष्ट भइसकेको छ । त्यस्तै किसान बिनोद यादवले रोपाइँका लागि तयार पारेको असारे धानको बेर्नासमेत हात्तीले सखाप पारेको स्थानीयले बताएका छन् ।
वन्यजन्तुका कारण खेतीपाती जोगाउन हरेक वर्ष संघर्ष गर्नुपरेको किसान दुखा महतोको गुनासो छ । उनका अनुसार धान पाक्ने समयमा हात्तीको समस्या दोहोरिने गरेको छ भने अन्य मौसममा बदेल, चित्तल र बाँदरले खेतीमा क्षति पुर्याउने गरेका छन् । यसले किसानले उत्पादन गरेको बालीको ठूलो हिस्सा नष्ट हुने गरेको उनी बताउँछन् ।
चितवन र पर्सा राष्ट्रिय निकुञ्जको सीमावर्ती क्षेत्रमा रहेको शिकारीबासका ५२ घरधुरीको मुख्य जीविकोपार्जन खेतीपाती हो । तर वन्यजन्तुको नियमित प्रवेशका कारण कृषि उत्पादनमा वर्षेनि ठूलो क्षति व्यहोर्नुपरेको स्थानीयको भनाइ छ । भौगोलिक रूपमा दुर्गम रहेको यो बस्ती वीरगंज–ठोरी हुलाकी सडकबाट करिब सात किलोमिटर जंगल पार गरेपछि मात्र पुगिन्छ । गाउँमा सडक, शिक्षा र स्वास्थ्यजस्ता आधारभूत सुविधाको अभाव रहेको स्थानीय बताउँछन् ।
शिकारीबास खोलामार्फत गाउँसम्म पुग्नुपर्ने भएकाले वर्षायाममा आवतजावत झन् कठिन बन्ने गरेको छ । गाउँमा कक्षा ५ सम्म मात्र अध्ययनको व्यवस्था भएकाले उच्च कक्षामा पढ्न विद्यार्थीले दैनिक करिब २४ किलोमिटर साइकल यात्रा गर्नुपर्ने बाध्यता छ । स्वास्थ्य चौकी भए पनि पर्याप्त जनशक्ति र औषधि अभावका कारण सामान्य उपचारका लागि समेत बाहिर जानुपर्ने अवस्था रहेको स्थानीयको गुनासो छ ।
स्थानीय बासिन्दाले वन्यजन्तुबाट हुने क्षति नियन्त्रण, बाली संरक्षण तथा पीडित किसानलाई राहत उपलब्ध गराउने प्रभावकारी कार्यक्रम सञ्चालन गर्न सम्बन्धित निकायसँग माग गरेका छन् । 
प्रतिक्रिया दिनुहोस् !