वीरगंज (पर्सा), ७ असार । ‘स्वस्थ वृद्धावस्थाका लागि योग’ भन्ने नाराका साथ जुन २१ अन्तर्राष्ट्रिय योग दिवस नेपालमा पनि विभिन्न कार्यक्रम आयोजना गरीे देशभर मनाएको छ । अन्तर्राष्ट्रिय योग दिवस हरेक वर्ष जुन २१ तारिखका दिन विभिन्न जनचेतनामूलक कार्यक्रम आयोजना गरी मनाइन्छ । संयुक्त राष्ट्रसङ्घको महासभाले सन् २०१४ मा गरेको निर्णयअनुसार सन् २०१५ जुन २१ देखि अन्तरराष्ट्रिय योग दिवस मनाउन थालिएको हो ।
यसैबिच अन्तराष्ट्रिय योग दिवसको अवसरमा वीरगंज स्थित भारतको महावाणिज्य दूतावासले आयोजना गरेको सप्ताहव्यापी योग शिविर आइतबार सम्पन्न भएको छ । ‘गरौं योग, रहौं निरोग’ मुख्य नारासहित जेठ ३० गतेदेखि वीरगंजस्थित शंकराचार्य गेट अगाडि सञ्चालित योग शिविर आइतबार भब्य रुपमा समापन भएको हो ।
महावाणिज्य दूतावास, वीरगंजका महावाणिज्यदूत डी. एस. मिनाको अध्यक्षता भएको समापन समारोहमा, प्रमुख अतिथि मधेश प्रदेशका मुख्यमन्त्री कृष्ण यादवले, मानवलाई शारिरिक तथा मानसिक रुपमा स्वस्थ, अनुशासित र सकारात्मक बनाउन योग अपरिहार्य रहेको बताए । कार्यक्रमका विशिष्ट अतिथि मधेश प्रदेशका कृषि मन्त्री श्याम पटेल, वनमन्त्री शंकर चौधरी, अतिथीहरू पर्साका प्रमुख जिल्ला अधिकारी भोला दाहाल तथा वीरगंज उद्योग वाणिज्य संघका अध्यक्ष हरि गौतमलगायतको सहभागिता थियो ।
सम्पन्न शिविरमा सहभागीहरूलाई बरिष्ठ योग गुरु धिरेन्द्र सिंह नेतृत्वको प्रशिक्षकहरूले योगाभ्यास गराएका थिए । योग दिवसको अवसरमा आयोजित विभिन्न कार्यक्रमहरूले समाजमा योगप्रति जनचेतना अभिवृद्धि गर्न महत्वपूर्ण योगदान पुर्याउने आयोजक महाबाणिज्य दुतवासले विश्वास जाहेर गरेको छ ।
यस्तै भारतीय राजदूतावासको आयोजनामा पोखराको रङ्गशालामा योगाभ्यास गरेर योग दिवस मनाइएको छ । भारतीय राजदूतावासको आयोजनामा पोखरामा चौंथो पटक योग दिवस मनाइएको हो । 
प्रतिक्रिया दिनुहोस् !