वीरगंज (पर्सा), १ असार । नेपाल चौहान कल्याण समाज, पर्साले चौहान जातिलाई अल्पसंख्यक समुदायको रूपमा आधिकारिक सूचीमा समावेश गर्न माग गर्दै प्रधानमन्त्री तथा मन्त्रिपरिषद्को कार्यालयलाई ज्ञापनपत्र बुझाएको छ । समाजका प्रतिनिधिहरूले पर्साका प्रमुख जिल्ला अधिकारी भोला दाहालमार्फत प्रधानमन्त्री कार्यालय, सिंहदरबार काठमाडौंमा उक्त ज्ञापनपत्र पठाएका हुन् ।
ज्ञापनपत्रमा मधेश प्रदेशका विभिन्न जिल्लासहित पर्सामा समेत चौहान समुदायको उल्लेख्य उपस्थिति रहे पनि सरकारी अभिलेख, जनगणना, नागरिकता तथा अन्य आधिकारिक दस्तावेजमा समुदायको स्पष्ट पहिचान स्थापित हुन नसकेको उल्लेख गरिएको छ । यही कारण समुदायका सदस्यहरू राज्यबाट प्रदान गरिने विभिन्न अवसर, अधिकार तथा सुविधाबाट वञ्चित हुने अवस्था रहेको समाजको दाबी छ ।
समाजका अनुसार पर्सा जिल्लाका विभिन्न स्थानीय तह र वडाहरूमा मात्रै करिब पाँच हजार चौहान समुदायका नागरिक बसोबास गर्दै आएका छन् । तर, ‘मधेशी समुदायको थर सूचीकरण अध्ययन प्रतिवेदन–२०७८’ मा चौहानलाई अन्य जातिको सूचीमा समावेश गरिएको भन्दै उक्त व्यवस्था पुनरावलोकन गरी चौहान जातिलाई छुट्टै पहिचानसहित अल्पसंख्यक समुदायमा सूचीकृत गर्न माग गरिएको छ ।
ज्ञापनपत्रमा नेपालको संविधान–२०७२ ले सुनिश्चित गरेका मौलिक हक, समावेशी प्रतिनिधित्व तथा राज्यका सेवा–सुविधामा समान पहुँच सुनिश्चित गर्न चौहान समुदायको पृथक् पहिचान आवश्यक रहेको उल्लेख छ । साथै समुदायको संरक्षण, संवद्र्धन र सशक्तीकरणका लागि आवश्यक नीति तथा कानुनी व्यवस्था गर्न सरकारसँग आग्रह गरिएको छ ।
जातीय सूचीकरण अभियानका संयोजक चन्देश कुमार चौहान तथा नेपाल चौहान कल्याण समाजका कार्यवाहक अध्यक्ष अवध बिहारी प्रसाद चौहानद्वारा हस्ताक्षरित ज्ञापनपत्रमा सम्बन्धित निकायमार्फत चौहान समुदायलाई अल्पसंख्यक सूचीमा समावेश गर्न आवश्यक पहल र सिफारिस गरिदिन अनुरोध गरिएको छ । समाजका अनुसार ज्ञापनपत्रको बोधार्थ राष्ट्रिय समावेशी आयोग, मधेसी आयोग, राष्ट्रिय तथ्याङ्क कार्यालय तथा मधेश प्रदेश सरकारअन्तर्गत मुख्यमन्त्री तथा मन्त्रिपरिषद्को कार्यालयलाई समेत पठाइएको छ । 
प्रतिक्रिया दिनुहोस् !