काठमाडौं, २१ जेठ । उपचारका लागि अस्पताल लैजाने नाममा एक कैदीलाई कारागारबाट बाहिर निकालेर होटलमा लगिएको, त्यहाँ मासु र बियर सेवन गर्न दिइएको तथा एक युवतीसँग समय बिताउन अवसर प्रदान गरिएको घटना सार्वजनिक भएको छ । प्रारम्भिक छानबिनले उक्त कार्य प्रहरीकै संरक्षण र संलग्नतामा भएको देखाएको छ । घटना गत जेठ १ गतेको हो । ठगी मुद्दामा सजाय भोगिरहेका कैदी अनुप भण्डारीलाई ढाडको उपचार गराउने भन्दै केन्द्रीय कारागार सुन्धारा तथा जगन्नाथदेवबाट बाहिर लगिएको थियो । कारागार प्रशासनको सिफारिसपछि उनलाई उपचारका लागि लैजान नेपाल प्रहरीको अनाश्रित गुल्म जगन्नाथदेवबाट प्रहरी सहायक हवल्दार होमबहादुर कुँवर र प्रहरी जवान टेकबहादुर विक खटिएका थिए ।
तर अस्पताल पुर्याउनुपर्ने कैदीलाई सामाखुसीस्थित दीप सागर गेस्ट हाउसमा लगिएको छानबिनबाट खुलेको छ । प्रहरी स्रोतका अनुसार गेस्ट हाउसको कोठा नम्बर ५०२ मा भण्डारीले मासु र बियर सेवन गरेका थिए भने एक महिलासँग करिब तीन घण्टा बिताएका थिए । उक्त अवधिमा सुरक्षामा खटिएका दुवै प्रहरी कर्मचारी पनि नजिकै उपस्थित रहेको बताइएको छ । घटनाबारे सूचना बाहिरिएपछि प्रहरी संगठनले आन्तरिक अनुसन्धान सुरु गरेको थियो । प्रहरी उपरीक्षक नरहरि रेग्मी नेतृत्वको टोलीले अनुसन्धान सम्पन्न गरी प्रतिवेदन काठमाडौं उपत्यका प्रहरी कार्यालय रानीपोखरीमा बुझाइसकेको स्रोतको दाबी छ ।
अनुसन्धानका क्रममा गेस्ट हाउसका व्यवस्थापक किसान गुरुङले पनि कैदी भण्डारी त्यहाँ बसेको पुष्टि गरेका छन् । प्रतिवेदनअनुसार दिउँसो करिब १ः४५ बजेदेखि उनी गेस्ट हाउसमा रहेका थिए । अनुसन्धानले सुरक्षामा खटिएका प्रहरी कर्मचारीहरूले कैदीको हतकडीसमेत खोलेको देखाएको छ ।
कैदी भण्डारीले समेत होटलमा लगिएको घटना स्वीकार गरेका छन् । उनको भनाइ उद्धृत गर्दै प्रतिवेदनमा उल्लेख गरिएअनुसार सुरुमा अस्पताल लगिएको भए पनि चिकित्सक आउन समय लाग्ने जानकारीपछि आफूलाई गेस्ट हाउस पुर्याइएको थियो । त्यहाँ मादक पदार्थ सेवन गर्न दिइएको र एक महिलासँग बस्न पाइएको तथ्य उनले स्वीकार गरेका छन् । घटनाको छानबिन सकिएपनि सम्बन्धित निकायले औपचारिक रूपमा सार्वजनिक जानकारी भने दिएको छैन । काठमाडौं उपत्यका प्रहरी कार्यालयका प्रमुख एआईजी ईश्वर कार्कीले घटनाबारे आफूलाई जानकारी नभएको प्रतिक्रिया दिएका छन् ।
यद्यपि छानबिन समितिले सुरक्षामा गम्भीर लापरबाही भएको निष्कर्ष निकाल्दै संलग्न प्रहरी कर्मचारीलाई सेवाबाट बर्खास्त गर्न सिफारिस गरेको छ । प्रतिवेदनमा कैदीबन्दीको सुरक्षाजस्तो संवेदनशील जिम्मेवारीमा खटिएका कर्मचारीले प्रहरी आचरणविपरीत गैरजिम्मेवार र अनुशासनहीन व्यवहार गरेको उल्लेख गरिएको छ । यस्ता कर्मचारीलाई संगठनमा राखिराख्दा संस्थाको विश्वसनीयतामै असर पुग्ने निष्कर्ष प्रतिवेदनमा छ । बर्खास्ती सिफारिसमा परेका प्रहरी कर्मचारीहरूले पनि कैदीलाई होटल लगिएको तथा त्यहाँ विशेष सुविधा दिइएको तथ्य अस्वीकार नगरेको स्रोतले जनाएको छ ।
यस घटनाले केन्द्रीय कारागारको सुरक्षा व्यवस्थामाथि थप प्रश्न खडा गरेको छ । सुन्धारा कारागारको सुरक्षा कमान्ड डीएसपी शैलेश न्यौपानेको नेतृत्वमा रहेको छ । यसअघि यही कारागारबाट जन्मकैद सजाय भोगिरहेकी सपना तामाङ फरार भएको घटना सार्वजनिक भएको थियो भने त्यसअघि महिला बन्दीगृहभित्र झडपसमेत भएको थियो । एक महिनाभित्र कारागारसँग सम्बन्धित लगातार तीन गम्भीर घटना सार्वजनिक भएपछि सुरक्षा संयन्त्रको प्रभावकारिता र निगरानी प्रणालीमाथि प्रश्न उठ्न थालेको छ । कारागारभित्रको अनुशासन, सुरक्षाकर्मीको जिम्मेवारी र कैदी व्यवस्थापन प्रणालीबारे गम्भीर समीक्षा आवश्यक रहेको सरोकारवालाहरूको भनाइ छ । 
प्रतिक्रिया दिनुहोस् !