वीरगंज (पर्सा), १९ जेठ । पर्साको जगरनाथपुर गाउँपालिकाले उदाउँदो महिला क्रिकेट प्रतिभालाई प्रोत्साहन गर्ने उद्देश्यले युवा खेलाडी मोनरमा कुमारी पासवानलाई क्रिकेट कीट उपलब्ध गराएको छ । जगरनाथपुर गाउँपालिका–२ निवासी सिकन्दर हजरा दुसादकी छोरी मोनरमा हाल वीरगञ्जस्थित श्री नेपाल राष्ट्रिय माध्यमिक विद्यालय, श्रीपुरमा कक्षा ८ मा अध्ययनरत छिन् ।
अध्ययनसँगै क्रिकेट खेलमा सक्रिय उनले जिल्ला स्तरीय महिला क्रिकेट टोलीबाट उत्कृष्ट प्रदर्शन गर्दै आफ्नो प्रतिभा स्थापित गर्दै आएकी छन् । यही प्रतिभालाई थप उचाइमा पुर्याउने लक्ष्यसहित गाउँपालिका अध्यक्ष श्रीकान्त प्रसाद यादवले आवश्यक क्रिकेट सामग्री हस्तान्तरण गरिएको स्थानीय विनय द्विवेदीले जानकारी दिए । कीट हस्तान्तरण कार्यक्रममा अध्यक्ष यादवले गाउँपालिकाभित्र रहेका प्रतिभाशाली खेलाडीहरूको पहिचान र क्षमता विकास स्थानीय सरकारको प्राथमिकतामा रहेको बताए ।
उननले खेलकुदले युवाहरूमा अनुशासन, आत्मविश्वास र नेतृत्व क्षमताको विकास गर्ने उल्लेख गर्दै बालबालिका तथा युवालाई खेलकुद गतिविधिमा सक्रिय सहभागिता जनाउन आग्रह गरे । साथै, भविष्यमा पनि खेल क्षेत्रका प्रतिभाहरूलाई आवश्यक सहयोग र प्रोत्साहन उपलब्ध गराइने प्रतिबद्धता व्यक्त गरे । क्रिकेट कीट प्राप्त गरेपछि मोनरमाले आफूलाई थप मेहनत गर्ने प्रेरणा मिलेको बताउँदै आगामी दिनमा जिल्ला, प्रदेश हुँदै राष्ट्रिय स्तरसम्म उत्कृष्ट प्रदर्शन गर्ने लक्ष्य रहेको प्रतिक्रिया दिइन् ।
स्थानीयवासी तथा अभिभावकहरूले गाउँपालिका अध्यक्षबाट गरिएको सहयोगले खेल क्षेत्रमा लागेका युवाहरूलाई नयाँ ऊर्जा र उत्साह प्रदान गर्ने विश्वास व्यक्त गरेका छन् । उनीहरूका अनुसार यस्ता सहयोगले ग्रामीण क्षेत्रका प्रतिभाशाली खेलाडीहरूलाई आफ्नो क्षमता प्रदर्शन गर्न थप अवसर मिल्नेछ ।
प्रतिक्रिया दिनुहोस् !