रक्सौल (विहार), १९ जेठ । वीरगंज–रक्सौलस्थित आश्रम रोडमा रहेको सेवक संजय नाथ काली न्यास विद्यालय परिसरमा काली सेनाको नयाँ कार्यालय सञ्चालनमा आएको छ । मंगलबार साँझ आयोजित एक विशेष समारोहबीच स्थानीय विधायक प्रमोद कुमार सिन्हाले कार्यालयको औपचारिक उद्घाटन गरेका हुन् ।
महिलाको आर्थिक सशक्तीकरण र स्वरोजगार प्रवद्र्धनलाई लक्ष्य बनाउँदै सक्रिय काली सेनाको नयाँ कार्यालय उद्घाटन कार्यक्रममा काली मन्दिरका पीठाधीश्वर सेवक संजय नाथ, समाजसेवी, राजनीतिक व्यक्तित्व तथा संस्थासँग आबद्ध महिला सदस्यहरूको उल्लेखनीय सहभागिता रहेको थियो ।
उद्घाटन समारोहलाई सम्बोधन गर्दै विधायक प्रमोद कुमार सिन्हाले काली सेनाले महिलाहरूलाई उद्यमशीलता र स्वरोजगारतर्फ उन्मुख गराउने महत्वपूर्ण काम गरिरहेको बताए । गृह उद्योगमार्फत महिलालाई आयआर्जनको अवसर सिर्जना गरी आत्मनिर्भर बनाउने संस्थाको प्रयास उदाहरणीय रहेको उल्लेख गर्दै उनले यस्ता अभियानलाई आवश्यक सहयोग उपलब्ध गराइने प्रतिबद्धता व्यक्त गरे ।
उनले संस्थाको विस्तार र विकासमा पीठाधीश्वर सेवक संजय नाथको निरन्तर सहयोगको प्रशंसा गर्दै महिलाको उत्थानका लागि सरकारी तथा गैरसरकारी तहबाट सहकार्य आवश्यक रहेको धारणा राखे । साथै, संस्थाकी अध्यक्ष पार्वती तिवारीले पिछडिएका तथा आर्थिक रूपमा कमजोर महिलाहरूलाई रोजगारीसँग जोड्न खेलेको भूमिकाको पनि उनले सराहना गरे ।
कार्यक्रममा बोल्दै पीठाधीश्वर सेवक संजय नाथले महिलाको दीर्घकालीन सशक्तीकरणका लागि आफूले देखेको सपना काली सेनामार्फत क्रमशः साकार बन्दै गएको बताए । संस्थाको पहलबाट धेरै महिलाहरू आत्मनिर्भर बन्न सफल भएको उल्लेख गर्दै उनले यसलाई सामाजिक परिवर्तनको सकारात्मक संकेतका रूपमा व्याख्या गरे ।
संस्थाकी अध्यक्ष पार्वती तिवारीका अनुसार हाल काली सेनासँग करिब २ हजार ६ सय महिलाहरू आबद्ध छन् । उनीहरूले तिसौरी, अदौरी, अचारलगायत विभिन्न घरेलु उत्पादन तयार गरी आम्दानी गरिरहेका छन् । बजारमा उत्पादित सामग्रीको माग बढ्दै गएको बताउँदै उनले नयाँ कार्यालय सञ्चालनसँगै संस्थाका गतिविधि थप व्यवस्थित र प्रभावकारी बन्ने तथा अझ धेरै महिलालाई रोजगारमूलक अवसरसँग जोड्न सहज हुने विश्वास व्यक्त गरिन् ।
कार्यक्रममा भाजपा नेता अजय पटेल, मृत्युन्जय सिंह, समाजसेवी निरुल्लाह खान, कन्हैया सर्राफ, प्रेम गुप्ता, सैफुल आजम, अबरार खान, विमल सर्राफ, दीपू श्रीवास्तव, दीपक श्रीवास्तव, पप्पु साहलगायत विभिन्न क्षेत्रका व्यक्तित्वहरूको उपस्थिति रहेको थियो । 
प्रतिक्रिया दिनुहोस् !