बुटवल, १६ जेठ । भारतको उत्तर प्रदेशस्थित कुशीनगर क्षेत्रमा विभिन्न प्रलोभनमा पारेर राखिएका ४५३ जना नेपाली नागरिकलाई उद्धार गरी नेपाल ल्याइएको छ । भारतीय प्रहरीको समन्वय र सहयोगमा नेपाल प्रहरीको टोलीले उनीहरूलाई सुरक्षित रूपमा स्वदेश फर्काएको हो । नेपाल प्रहरीको टोली शुक्रबार राति कुशीनगर पुगेको थियो । त्यहाँबाट उद्धार गरिएका नेपाली नागरिकलाई आठवटा बसमार्फत शनिबार बिहान बेलहिया नाका हुँदै रुपन्देही ल्याइएको प्रहरीले जनाएको छ ।
जिल्ला प्रहरी कार्यालय रुपन्देहीका प्रमुख प्रहरी उपरीक्षक (एसपी) जनकबहादुर शाहीका अनुसार उद्धार गरिएकामध्ये करिब आधाजति महिला रहेका छन् । हाल उनीहरूको पहिचान खुलाउने तथा व्यक्तिगत विवरण संकलन गर्ने काम भइरहेको उनले बताए । एसपी शाहीले रोजगारीलगायत विभिन्न आश्वासन र प्रलोभनमा पारेर नेपालीहरूलाई भारतको कुशीनगर क्षेत्रमा पुर्याइएको सूचना प्राप्त भएपछि उद्धार अभियान सञ्चालन गरिएको जानकारी दिए । उनका अनुसार आवश्यक विवरण संकलन र कानुनी प्रक्रिया पूरा गरेपछि सबैलाई सम्बन्धित घरपरिवारसम्म पठाइनेछ ।
प्रहरीले तथ्यांक संकलन तथा पहिचान प्रमाणीकरणका काम सम्पन्न गर्न केही समय लाग्ने जनाएको छ । साथै, ती नेपाली नागरिकहरूलाई भारतसम्म कसले र कुन उद्देश्यले पुर्यायो भन्ने विषय अझै खुल्न बाँकी रहेको र त्यसबारे विस्तृत अनुसन्धान अघि बढाइने एसपी शाहीले बताए । घटनाले नेपाली नागरिकलाई वैदेशिक रोजगारी तथा अन्य आकर्षक प्रस्तावको नाममा जोखिमपूर्ण अवस्थातर्फ लैजाने गिरोह सक्रिय हुन सक्ने संकेत गरेको भन्दै प्रहरीले यस प्रकरणलाई गम्भीरतापूर्वक अनुसन्धान गरिरहेको छ । 
प्रतिक्रिया दिनुहोस् !