वीरगंज (पर्सा), १५ जेठ । मानवसेवा आश्रम को वीरगंज शाखाले शुक्रबार आफ्नो ९औँ स्थापना दिवस विभिन्न कार्यक्रमका साथ मनाएको छ । नौ वर्षअघि नारायणी अस्पतालबाट एक सहयोगापेक्षी व्यक्तिको उद्धारसँगै सुरु भएको शाखाले हाल सयौं बेसहारा नागरिकको सहारा बनेर मानवीय सेवाको उदाहरण प्रस्तुत गरिरहेको छ । वि.सं. २०७४ जेठ १५ गते नारायणी अस्पताल परिसरबाट ‘शंकर’ नाम गरेका एक सहयोगापेक्षी व्यक्तिको उद्धार गर्दै मानवसेवा आश्रम वीरगंज शाखाको औपचारिक सुरुआत गरिएको थियो ।
उक्त अभियानमा आश्रमका संस्थापक देवेश गुप्ता सहित तत्कालीन प्रमुख जिल्ला अधिकारी केशव प्रसाद घिमिरे, डा. दीपक शाक्य, मीनाक्षी गुप्ता, रहबर अन्सारी, उषा शाह, कनिका कौशिक, मायामितु न्यौपाने लगायतको उल्लेखनीय सहभागिता रहेको थियो । शाखा स्थापना भएदेखि २०७९ सालसम्म वीरगंज-९ मा इन्डियन एम्बेसी पछाडिको भाडाको घरबाट सेवा सञ्चालन गरिएको थियो । पछि २०८० सालमा प्रदेशसभा सदस्य रमेश पटेलको पहलमा वीरगंज-२५ श्रीसियामा निर्माण गरिएको वृद्धाश्रम भवनमा आश्रमलाई व्यवस्थित रूपमा स्थानान्तरण गरिएको हो ।
आश्रमले वीरगंज महानगरपालिकाबाट वीरगंज-१५ लक्ष्मणवामा प्राप्त १४ कठ्ठा जग्गामा करिब २० करोड रुपैयाँ लागतमा आधुनिक तथा सुविधा सम्पन्न आफ्नै भवन निर्माणको कामसमेत अघि बढिसकेको जनाएको छ । विशुद्ध परोपकारी र गैरनाफामूलक सामाजिक संस्थाका रूपमा परिचित मानवसेवा आश्रमले २०६९ सालदेखि देशभर मानव सेवाको अभियान सञ्चालन गर्दै आएको छ ।
२०७३ साउन २ गते जिल्ला प्रशासन कार्यालय काठमाडौंमा विधिवत् दर्ता भएको संस्थाले सडकपेटी, खुला आकाशमुनि तथा सार्वजनिक स्थलमा कष्टपूर्ण जीवन बिताइरहेका सहयोगापेक्षी मानवहरूको उद्धार, उपचार, पालनपोषण, संरक्षण तथा पारिवारिक पुनर्मिलनको कार्य गर्दै आइरहेको छ । हाल आश्रमले ‘घरपरिवारविहीन, बेसहारा तथा सहयोगापेक्षी मानवमुक्त नेपाल’ निर्माण गर्ने लक्ष्यसहित सातै प्रदेशका २२ जिल्लामा ३४ वटा सेवाकेन्द्र सञ्चालन गरिरहेको जनाएको छ ।
वीरगंज शाखाका अनुसार स्थापना कालदेखि हालसम्म ३४२ जनाको उद्धार गरिएको छ । तीमध्ये १५९ जनालाई परिवारसँग पुनर्मिलन गराइएको छ भने ३३ जनाको सामुदायिक पुनर्स्थापना गरिएको छ । यस्तै ६५ जनालाई आश्रमका अन्य शाखामा स्थानान्तरण गरिएको र ४१ जनाले आश्रममै अन्तिम श्वास लिएको शाखाले जनाएको छ । हाल श्रीसियास्थित आश्रममा ४४ जना महिला, पुरुष तथा बालबालिका आश्रितका रूपमा बसोबास गरिरहेका छन् ।
संस्थापक देवेश गुप्ताले आश्रम पर्सा–बारावासीको माया, विश्वास र सहयोगकै बलमा निरन्तर अघि बढिरहेको बताए । ‘धेरैले यस्तो संस्था कसरी सञ्चालन भइरहेको छ भनेर प्रश्न गर्नुहुन्छ,’ उनले भने, ‘हामी गर्वका साथ भन्छौं यो आश्रम पर्सा–बाराका आम नागरिकको पसिनाको कमाइ र सहयोगबाट चलेको संस्था हो ।’
उनका अनुसार दैनिक ज्याला मजदुरी गरेर जीवन धान्ने श्रमिकदेखि उद्योगपति, व्यापारी, कर्मचारी, विद्यार्थी र गृहिणीसम्म सबै वर्गका व्यक्तिहरूले आफ्नो क्षमता अनुसार सहयोग गर्दै आएका छन् । सहयोगी मन, दाताहरू र शुभेच्छुकहरूको निरन्तर साथबिना ९ वर्षको यात्रा सम्भव नहुने उनले बताए । वार्षिकोत्सवको अवसरमा मानवसेवा आश्रम वीरगंज परिवारले विगत नौ वर्षदेखि निरन्तर सहयोग, माया, विश्वास र हौसला प्रदान गर्ने सम्पूर्ण वीरगंजवासी तथा शुभेच्छुकहरूप्रति आभार व्यक्त गर्दै ‘मानवता नै सबैभन्दा ठूलो धर्म हो’ भन्ने भावनासहित सेवा कार्यलाई अझ सशक्त रूपमा अघि बढाउने प्रतिबद्धता जनाएको छ । 
प्रतिक्रिया दिनुहोस् !