वीरगंज (पर्सा), ७ जेठ । मानव संसाधन समाज नेपाल मधेश च्याप्टरले वीरगंजमा ‘अन्तर्राष्ट्रिय मानव संसाधन दिवस २०२६’ विशेष कार्यक्रमसहित भव्य रूपमा मनाएको छ । वीरगंज उद्योग वाणिज्य संघ (बीआईसीसीआई) सँगको सहकार्यमा आयोजित कार्यक्रममा ‘परिवर्तनको नेतृत्व गर्न मानिसलाई सशक्त बनाऔँ’ भन्ने नारासहित ज्ञान आदान–प्रदान तथा अन्तरक्रिया कार्यक्रम सम्पन्न गरिएको हो ।
कार्यक्रममा नेतृत्व विकास, कर्मचारी सशक्तीकरण तथा मानव संसाधन व्यवस्थापनको रणनीतिक भूमिकाबारे विशेष प्रस्तुति तथा छलफल गरिएको थियो । सहभागीहरूले संस्थागत विकास र कार्यक्षेत्रमा सकारात्मक परिवर्तन ल्याउन मानव संसाधन व्यवस्थापनको भूमिका अत्यन्त महत्वपूर्ण रहेको धारणा राखेका थिए ।
कार्यक्रमको उद्घाटन हरिप्रसाद गौतम ले गरेका थिए । कार्यक्रममा डाबर नेपालका फ्याक्ट्री प्रमुख (मानव संसाधन) आशुतोष यादवले प्रमुख वक्ताका रूपमा नेतृत्व विकास र कर्मचारी व्यवस्थापनसम्बन्धी विशेष प्रस्तुति दिएका थिए । मानव संसाधन समाज नेपालका बोर्ड सदस्य तथा मधेश प्रदेश अध्यक्ष अनिल जयसवाल को सभापतित्वमा सम्पन्न कार्यक्रममा विभिन्न कम्पनीमा मानव संसाधन क्षेत्रमा कार्यरत ३५ जनाको सहभागिता रहेको थियो ।
सहभागीहरूले यस्ता ज्ञानमूलक कार्यक्रमले नेतृत्व क्षमता अभिवृद्धि गर्नुका साथै कार्यस्थलमा सकारात्मक सोच र प्रभावकारी व्यवस्थापन विकास गर्न महत्वपूर्ण योगदान पुग्ने विश्वास व्यक्त गरेका थिए । 
प्रतिक्रिया दिनुहोस् !