जनकपुरधाम (धनुषा), २५ असोज । जनकपुरधाममा छुरा प्रहारबाट एक युवकको हत्या र अर्का युवक गम्भीर घाइते भएको घटनाका आरोपीसँग सामाजिक सञ्जालमा हिंसा प्रोत्साहन गर्ने भिडियो बनाएको आरोपमा सशस्त्र प्रहरीका एक जवान पनि अनुसन्धानमा तानिएका छन् । हिंसात्मक तथा अभद्र अभिव्यक्ति समेटिएका टिकटक र रिल्समा हत्या आरोपी इर्साद खानसँगै देखिएको भन्दै सशस्त्र प्रहरी जवान ऋषि मण्डलमाथि अनुसन्धान सुरु गरिएको हो । घटनापछि उक्त भिडियो सामाजिक सञ्जालमा पुनः भाइरल बनेसँगै जवान मण्डलको भूमिकामाथि प्रश्न उठेको छ ।
जनकपुरधाममा बिहीबार साँझ इर्सादले छुरा प्रहार गर्दा जनकपुरधाम उपमहानगरपालिका–५ निवासी २४ वर्षीय आमिन साफीको मृत्यु भएको थियो । घटनामा २५ वर्षीय इम्तियाज राइन गम्भीर घाइते भएका छन् । प्रहरी अनुसन्धानका क्रममा इर्साद स्थानीयस्तरमा ‘गुण्डा’ भनेर चिनिने गरेको विवरणसमेत सार्वजनिक भएको छ । उनी र सशस्त्र प्रहरी जवान मण्डलले केही महिनाअघि सँगै सामाजिक सञ्जालका लागि भिडियो बनाएको खुलेको छ ।
खुकुरी देखाउँदै धम्की, जवान मण्डल पनि भिडियोमा
सामाजिक सञ्जालमा भाइरल भएको एउटा भिडियोमा इर्सादले खल्तीबाट खुकुरी निकालेर प्रदर्शन गर्दै अभद्र गालीगलौज र हिंसा गर्ने चेतावनी दिएको सुनिन्छ । उक्त भिडियोमा सशस्त्र प्रहरी जवान मण्डल पनि देखिएका छन् । उनको उपस्थितिलाई लिएर प्रहरी आचरणविपरीत व्यवहार भएको भन्दै प्रश्न उठाइएको छ ।
प्रहरी अनुसन्धानमा इर्सादले अर्को समुदायलाई लक्षित गरी हिंसा भड्काउने तथा सामाजिक सद्भाव बिगार्न सक्ने प्रकृतिका अन्य भिडियोसमेत बनाएको खुलेको बताइएको छ । यद्यपि, ती सामग्रीको वास्तविक सन्दर्भ र त्यसमा संलग्न व्यक्तिहरूको भूमिकाबारे अनुसन्धानबाट थप तथ्य खुल्न बाँकी छ ।
आमिन साफीको हत्यापछि इर्सादसँग सम्बन्धित पुराना भिडियोहरू पुनः सामाजिक सञ्जालमा फैलिएका छन् । तीमध्ये सशस्त्र प्रहरी जवान मण्डलसमेत देखिएको भिडियो सार्वजनिक भएपछि उनीमाथि पनि कारबाही गर्नुपर्ने माग उठेको हो ।
सशस्त्र प्रहरीद्वारा जवानमाथि सोधपुछ
सशस्त्र प्रहरी बलका मधेश प्रदेश प्रमुख डीआईजी विष्णु भट्टले जवान मण्डलमाथि अनुसन्धान भइरहेको पुष्टि गरेका छन् । उनका अनुसार घटनापछि सामाजिक सञ्जालमा सार्वजनिक भएको भिडियोमा प्रहरी कर्मचारीको आचरणविपरीत व्यवहार देखिएकाले जवानलाई तानेर सोधपुछ तथा अनुसन्धान अघि बढाइएको हो ।
‘जनकपुरमा छुरा प्रहारको घटना भएपछि जवान ऋषि मण्डलको पनि भिडियो भाइरल भइरहेको छ । त्यो भिडियोमा प्रहरीको आचरणविपरीत व्यवहार भएको देखिन्छ,’ डीआईजी भट्टले भने, ‘यसपछि पर्साबाट तानेर गणमा उनीमाथि सोधपुछ तथा अनुसन्धान भइरहेको छ ।’ डीआईजी भट्टका अनुसार यस विषयमा नेपाल प्रहरीसँग पनि समन्वय भइरहेको छ ।
हत्याको घटनामा संलग्न आरोपीसँगको सम्बन्ध, हिंसात्मक अभिव्यक्ति समेटिएको भिडियोमा जवानको भूमिका र प्रहरी संगठनको आचरणविपरीत गतिविधि भए–नभएको विषय अनुसन्धानको दायरामा छ । अनुसन्धानबाट दोष र संलग्नता पुष्टि भएमा सम्बन्धित कानुन तथा संगठनको नियमअनुसार कारबाही हुने अपेक्षा गरिएको छ । 
प्रतिक्रिया दिनुहोस् !