वीरगंज (पर्सा), ७ जेठ । सरकारले सञ्चालन गरेको ‘राष्ट्रिय पोषण लेखाजोखा अभियान’को प्रारम्भिक प्रतिवेदनले मधेश प्रदेशका बालबालिकामा कुपोषणको अवस्था विगतभन्दा बढेको देखाएको छ । स्वास्थ्य तथा खाद्य स्वच्छता मन्त्रालय अन्तर्गत स्वास्थ्य सेवा विभाग, पोषण शाखाका प्रमुख लिलाविक्रम थापाका अनुसार यस पटक मधेश लगायत कर्णाली र सुदुर पश्चिम प्रदेशमा कडा र शिघ्र कुपोषण देखिएको छ ।
कडा शीघ्र कुपोषण भएका बालबालिकालाई ‘तयारी उपचारात्मक खाना’ उपलब्ध गराइने र त्यसबाट सुधार नभएमा देशभर रहेका २५ वटा पुनः स्थापना केन्द्रमा आमा र बच्चालाई राखेर नियमित उपचार तथा पोषणयुक्त खाना खुवाइने व्यवस्था गरिएको शाखा प्रमुख थापाले जानकारी दिए ।
समग्रमा मुलुकका चार प्रतिशत बालबालिकामा कडा शीघ्र कुपोषण भेटिएको छ । यसअघि यो दर एक प्रतिशतमात्रै थियो । यस पटक देशभर नै अभियान सञ्चालन गरिएकाले पहिलेभन्दा बढी संख्यामा कुपोषित बालबालिका पहिचान भएका थापाको भनाई छ । 
प्रतिक्रिया दिनुहोस् !