जनकपुर (धनुषा), ५ जेठ । जसपा नेपालका संरक्षक महन्थ ठाकुरले मधेश क्षेत्रमा भइरहेको चुरे दोहन तथा बजेट कार्यान्वयनको प्रभावकारितामाथि गम्भीर प्रश्न उठाएका छन् । राष्ट्रिय सभाअन्तर्गतको विकास, आर्थिक मामिला तथा सुशासन समितिको सोमबार बसेको बैठकमा धारणा राख्दै ठाकुरले विकासका नाममा योजना अघि बढाइए पनि व्यवहारमा अपेक्षित परिणाम नदेखिएको टिप्पणी गरे । उनले चुरे र भावर क्षेत्रमा भइरहेको अनियन्त्रित प्राकृतिक स्रोत दोहनका कारण मधेशमा गम्भीर वातावरणीय तथा मानवीय संकट बढ्दै गएको बताए ।
अत्यधिक उत्खननका कारण वर्षायाममा उत्तरी क्षेत्रमा कटान र दक्षिणी क्षेत्रमा डुबानको समस्या झन् भयावह बन्दै गएको उनको भनाइ थियो । ठाकुरले महिनौँसम्म बस्ती डुबानमा पर्दासमेत राज्यका निकायले आवश्यक चासो नदिएको भन्दै असन्तुष्टि व्यक्त गरे । वातावरणीय असन्तुलन र भौतिक विनाशका कारण कतिपय क्षेत्रमा विगतमा सञ्चालनमा रहेका विद्यालयसमेत बन्द हुने अवस्थामा पुगेको उनले उल्लेख गरे । बजेट विनियोजन र खर्च प्रक्रियामाथि प्रश्न उठाउँदै उनले विकासका लागि छुट्याइएको रकमको प्रभावकारी उपयोग हुन नसकेको आरोप लगाए । उनले भने, ‘हामी चुरे विनाशको कुरा गरिरहेका छौँ, तर त्यहाँबाट ढुङ्गा, गिट्टी, बालुवा निकाल्ने क्रम रोकिएको छैन । भावर क्षेत्रको अवस्था पनि उस्तै छ । बजेट जान्छ, तर त्यसको प्रतिफल देखिँदैन । आधा बजेट कहाँ हराउँछ भन्ने थाहा हुँदैन ।’
विगतका वर्षमा विनियोजित बजेट लक्षित वर्गसम्म पुग्न नसकेको उल्लेख गर्दै उनले आगामी बजेट कार्यान्वयन परिणाममुखी हुनुपर्नेमा जोड दिए । उनका अनुसार विकास योजना कागजमै सीमित नभई जनताले प्रत्यक्ष अनुभूति गर्ने गरी लागू हुन आवश्यक छ । बैठकमा ठाकुरले सरकारलाई मधेशको संवेदनशील भूगोल र समस्यालाई गम्भीरतापूर्वक बुझेर विकास योजनालाई प्रभावकारी रूपमा कार्यान्वयन गर्न ध्यानाकर्षणसमेत गराए । 
प्रतिक्रिया दिनुहोस् !