वीरगंज (पर्सा), ४ जेठ । ‘राष्ट्र, राष्ट्रियता, धर्म, संस्कृति र नागरिक बचाऔँ महाअभियान नेपाल’का संयोजक दुर्गा प्रसाईंलाई प्रहरीले सोमबार राति वीरगंजबाट नियन्त्रणमा लिएको छ । पर्सा प्रहरीले उनलाई वीरगञ्जस्थित सिद्धार्थ दियालो होटलबाट नियन्त्रणमा लिएर जिल्ला प्रहरी कार्यालय पर्सा पुर्याएको हो ।
प्रसाईं सोमबार दिउँसो सिमरा विमानस्थल हुँदै वीरगञ्ज आएका थिए । उनको आगमनका क्रममा समर्थकहरूले विमानस्थलमा भव्य स्वागत गरेका थिए । फूलमाला, नाराबाजी तथा विभिन्न स्वागत कार्यक्रममार्फत समर्थकहरूले प्रसाईंप्रति समर्थन जनाएका थिए । त्यसपछि वीरगञ्जका विभिन्न स्थानमा उनका समर्थकहरूको बाक्लो उपस्थितिसमेत देखिएको थियो । उनको भ्रमणलाई ध्यानमा राख्दै सुरक्षा निकायले वीरगंजका मुख्य क्षेत्रहरूमा निगरानी कडा बनाएको थियो । जिल्ला प्रशासन र सुरक्षा संयन्त्रले सम्भावित सुरक्षा संवेदनशीलतालाई मध्यनजर गर्दै विशेष सतर्कता अपनाएको स्रोतले जनाएको छ ।
सोमबार राति आफू बसेकै होटलमा वीरगंजवासीसँग भेटघाट तथा छलफल कार्यक्रम चलिरहेका बेला प्रहरीले प्रसाईंलाई नियन्त्रणमा लिएको बताइएको छ । पक्राउका क्रममा प्रहरीले उनलाई पक्राउ पुर्जीसमेत दिएको थियो । तर कुन आरोप वा कसुरमा नियन्त्रणमा लिइएको हो भन्नेबारे भने स्पष्ट खुलाइएको छैन । घटनाबारे जानकारी लिन पर्सा प्रहरीका प्रवक्ता प्रहरी नायब उपरीक्षक हरि बहादुर बस्नेतसँग सम्पर्क गर्ने प्रयास गरिए पनि फोन सम्पर्क हुन सकेन ।
प्रसाईंको मंगलबार बिहान वीरगंजको प्रसिद्ध धार्मिक स्थल गहवामाई मन्दिरमा पूजा–पाठ गर्ने कार्यक्रम तय गरिएको थियो । उनी बसेको होटलबाट समर्थकहरूसँग पैदल यात्रा गर्दै मन्दिर जाने तयारी रहेको बताइएको थियो । त्यसअघि नै प्रहरीले उनलाई नियन्त्रणमा लिएपछि कार्यक्रम प्रभावित भएको छ ।
पछिल्लो समय विभिन्न राजनीतिक तथा सामाजिक मुद्दामा मुखर रूपमा प्रस्तुत हुँदै आएका प्रसाईंको वीरगञ्ज भ्रमणलाई उनका समर्थकहरूले विशेष चासोका साथ हेरिरहेका थिए । उनी पक्राउ परेपछि केही समर्थकहरूले आक्रोश व्यक्त गर्दै प्रधानमन्त्रीविरुद्ध नाराबाजीसमेत गरेका थिए । 
प्रतिक्रिया दिनुहोस् !